Pika (NSS) - သြဂုတ် ၂၄ 

အမေရိကန်နိုင်ငံ ကယ်လီဖိုးနီးယားပြည်နယ် Orange ကောင်တီရှိ ဘားတစ်ခုတွင် ဩဂုတ်လ(၂၃)ရက် ညက ပစ်ခတ်မှုများဖြစ်ပွားခဲ့ရာ အနည်းဆုံးလူ(၅)ဦးသေဆုံးခဲ့ပြီး အခြားလူ(၆)ဦး ထိခိုက်ဒဏ်ရာရရှိခဲ့ကြောင်း အာဏာပိုင်များက ပြောကြားခဲ့သည်၊၊

အဆိုပါ သေနတ်သမားသည်လည်း သေဆုံးသူငါးဦးထဲတွင် ပါဝင်ခဲ့ကြောင်း ရဲတပ်ဖွဲ့က ထုတ်ပြန်ထားသော အစီရင်ခံစာတွင် ဖော်ပြထားသည်။ ပစ်ခတ်မှုများဖြစ်ပွားပြီးနောက် ထိခိုက်ဒဏ်ရာရရှိခဲ့သော လူ(၆)ဦးကို ဆေးရုံ သို့ ချက်ချင်းပို့ဆောင်ခဲ့ကြောင်း Orange ကောင်တီရဲဌာနက ပြောကြားခဲ့သည်။ အဆိုပါပစ်ခတ်မှုသည် ကယ်လီဖိုးနီးယားပြည်နယ် Orange ကောင်တီ Trabuco Canyon မြို့ရှိ Santiago Canyon လမ်းပေါ်တွင်ရှိသော ဘားတစ်ခုဖြစ်သည့်  Cook's Corner ဘားတွင် ဩဂုတ်လ(၂၃)ရက် ည(၇)နာရီခွဲအချိန်က ဖြစ်ပွားခဲ့ခြင်းဖြစ် ကြောင်း သိရသည်။ 

အာဏာပိုင်များက "ဒီသေနတ်ပစ်ခတ်မှုအတွင်းမှာ သေနတ်သမားလည်း သေဆုံးခဲ့ပါတယ်။ အခင်းဖြစ်ပွားရာနေရာကို စုံစမ်းစစ်ဆေးမှုတွေ လုပ်ဖို့ ပိတ်ဆို့ထားပါတယ်" ဟု ပြောခဲ့သည်။

ပစ်ခတ်မှုများဖြစ်ပွားပြီးနောက် FBI အေးဂျင့်များ နှင့် ATF ဗျုရိုမှ တာဝန်ရှိသူများသည် အခင်းဖြစ်ပွားရာနေရာသို့ ချက်ချင်းသွားရောက်ခဲ့ပြီး Orange ကောင်တီရဲအရာရှိများက ဦးဆောင်ကာ စုံစမ်းစစ်ဆေးမှုများကို ဆက်လက်လုပ်ဆောင်သွားမည်ဖြစ်ကြောင်း သိရသည်။