NSS - ဩဂုတ် ၁၉

ဒလမြို့နယ်၌ ဘတ္ထရီစက်ဘီးအပါအဝင် EV လျှပ်စစ် နှစ်ဘီး၊ သုံးဘီးယာဉ်များ ဖမ်းဆီးမည်ဟု အသံချဲ့ စက်ဖြင့် ရပ်ကွက်များအတွင်း လိုက်လံကြေညာမှုများရှိနေကြောင်း ဒလမြို့ခံအချို့ထံမှ သိရသည်။ 

လတ်တလောသည် ပညာပေးကာလဖြစ်ပြီး လာမည့် ဩဂုတ်လ ၂၁ ရက်မှစတင်ကာ ဖမ်းဆီးအရေးယူသွားမည်ဟု ကြေညာချက်တွင် ထည့်သွင်းအသိပေးထားကြောင်း သိရသည်။

“ဆိုင်ကယ်တွေအရင်ဖမ်းတယ်။ အခုဘတ္ထရီစက်ဘီးတွေပါဖမ်းမယ်ပြောနေတယ်။ ဓါတ်ဆီ သုံးဘီးကယ်ရီတွေနဲ့သွားမယ်ဆိုရင် ကယ်ရီခက သုံးထောင်ကျော်တယ်လေ။ ဒလမှာကလိုင်းကားမရှိတော့ ဘတ္ထရီစက်ဘီးကိုဘဲ အားကိုးနေရတာ အခုတော့မစီးရဲကြလို့ အိမ်ထဲမှာသိမ်းထားရတော့မယ်”ဟု ဒလမြို့နယ်မှ လူငယ်တစ်ဦးကပြောသည်။

ဒလမြို့နယ်ရှိ ပြည်သူအများစုသည် ဘတ္ထရီစက်ဘီးများဖြင့်ရုံးတက်ရုံးဆင်း အသုံးပြုသွားလာနေရခြင်းဖြစ်ပြီး EV လျှပ်စစ် နှစ်ဘီး၊ သုံးဘီးယာဉ် အနည်းငယ်ကိုလဲ အသုံးပြုနေကြကြောင်း သိရသည်။

"တစ်ချို့နေရာတွေမှာ လိုက်အော်တယ်ပြောတယ်။ တစ်ချို့ရပ်ကွက်တွေမှာတော့မအော်ဘူး။ တစ်ချို့ရပ်ကွက်တွေမှာ အဲဒီလိုအော်တဲ့အခါကျတော့ လူတွေက ကြောက်ပြီးတော့ စီးရမလို၊ မစီးရမလိုဖြစ်နေတာပေါ့။ တကယ်တော့ အဲဒါနဲ့မစီးရင်လည်း တော်တော်အလုပ်မဖြစ်ဘူးလေ။ တော်တော်ဝေးတဲ့နေရာ‌ လေးတွေရှိတယ်လေ။ ကလေးတွေကျောင်းပို့တာတွေ ဘာတွေကျတော့အဆင်မပြေဘူးလေ။ ဘတ်စ်ကားကလည်းမရှိဘူး။ သုံးဘီးဆိုတာကလည်း တစ်ခါသွားရင် တစ်ကြောင်းကို နှစ်ထောင်ဆိုတော့  ကျောင်းပို့မယ့်လူဆိုရင် အသွားတစ်ခေါက် အပြန်တစ်ခေါက်နဲ့ ဘယ်သူက တတ်နိုင်မှာလဲ"ဟု ဒလမြို့ခံ တစ်ဦးကလည်း ပြောသည်။ 

နိုင်ငံရေး အပြောင်းအလဲ အပြီး ၂၀၂၁ခုနှစ် ဧပြီလကတည်းက ဒလ၌ဆိုင်ကယ်စီးခွင့်ပိတ်ပင်ထားသည့် အပြင် လက်ရှိ၌ ဘတ္ထရီစက်ဘီးအပါအဝင် EV လျှပ်စစ် နှစ်ဘီး၊ သုံးဘီးယာဉ်များကိုပါဖမ်းဆီးမည်ဟု သက်ဆိုင်ရာက ထပ်မံစည်းကမ်းများတင်းကြပ်နေခြင်းဖြစ်သည်။