ဂျန်ဇက် (NSS) - ဩဂုတ် ၁၉

အမေရိကန်အစိုးရဟာ နိုင်ဂျာနိုင်ငံရှိ အမေရိကန်ဒရုန်းအခြေစိုက်စခန်းနှစ်ခုရှိ တပ်ဖွဲ့ဝင်များကို ပြန်ကယ်ထုတ်မှုတွေလုပ်ဆောင်သွားဖွယ်ရှိနေကြောင်း လေတပ်ဗိုလ်ချုပ် ဂျိန်းစ့်ဟတ်ကာက ထုတ်ဖော်ပြောဆိုလိုက်ပါတယ်။ 

အနောက်အာဖရိကနိုင်ငံများ စီးပွားရေးအဖွဲ့ ECOWAS အဖွဲ့ဝင်နိုင်ငံတွေဟာ အာဏာသိမ်းမှုဖြစ်ပွားခဲ့တဲ့ နိုင်ဂျာစစ်အစိုးရကို ဖြုတ်ချဖို့ ရည်ရွယ်ပြီး စစ်ရေးကျူးကျော်တိုက်ခိုက်ဖို့ ပြင်ဆင်မှုများရှိလာချိန်မှာအမေရိကန်အစိုးရက တပ်ဖွဲ့ဝင်တွေ ပြန်လည်ခေါ်ယူဖို့ စီစဉ်နေခြင်းဖြစ်ပါတယ်။ ဗိုလ်ချုပ်ဟတ်ကာက နိုင်ဂျာနိုင်ငံကနေ အမေရိကန်တပ်ဖွဲ့တွေ ပြန်ထွက်ခွာခြင်းဟာ သက်ရောက်မှုများ ဖြစ်လာဖွယ်ရှိနေကြောင်းပြောပါတယ်။ နိုင်ဂျာနိုင်ငံမှာ ပြီးခဲ့တဲ့လက အာဏာသိမ်းမှုဖြစ်ပွားခဲ့ပြီးနောက် အမေရိကန်အစိုးရဟာ နိုင်ဂျာစစ်အစိုးရအပေါ် ဆက်ဆံမှုများကိုရှောင်ရှားခဲ့တယ်လို့ ဆိုပါတယ်။

နိုင်ဂျာမှာအာဏာသိမ်းမှုဖြစ်ပွားခဲ့ပြီးနောက်ပိုင်း ပြင်သစ်နဲ့အနောက်အုပ်စုနိုင်ငံတွေဟာ အကူအညီပေးမှုများရပ်ဆိုင်းခဲ့ကြောင်း သိရပါတယ်။ အာဏာသိမ်းမှုမဖြစ်ပွားခင်က နိုင်ဂျာနိုင်ငံမှာ ပြင်သစ်တပ်ဖွဲ့ဝင် ၁၅၀၀ နဲ့ အမေရိကန်တပ်ဖွဲ့ဝင် ၁၀၀၀ ကျော်ရှိနေကြောင်းသိရပါတယ်။ ECOWAS အဖွဲ့ဟာ နိုင်ဂျာစစ်အစိုးရကိုတိုက်ခိုက်ဖို့ ရက်သတ်မှတ်ချက်များ သဘောတူညီမှုရရှိခဲ့ပြီးဖြစ်ရာ မကြာခင် နိုင်ဂျာကို စစ် တိုက်ဖွယ်ရှိနေတယ်လို့သတင်းတွေ ထွက်ပေါ်နေပါတယ်။ နိုင်ဂျာစစ်အစိုးရကတော့ စစ်ရေးနည်းလမ်းအသုံးပြုလာမယ်ဆိုရင် ဖမ်းဆီးထိန်းသိမ်းထားတဲ့ ဘာဇွန်ကို သတ်ပစ်မယ်လို့ပြီးခဲ့တဲ့ရက်ပိုင်းမှာသတိ ပေးထားပါတယ်။

အာဖရိကသမ္မတကတော့ နိုင်ဂျာအပေါ် စစ်ရေးနည်းလမ်းအသုံးပြုမယ့် ECOWAS ရဲ့အစီအစဉ်ကို လိုလားလက်ခံခြင်းမရှိကြောင်းသိရပါတယ်။ နိုင်ဂျာကို စစ်ရေးနည်းလမ်းအသုံးပြုမယ့် ECOWAS ရဲ့အစီအစဉ်ကို ပြင်သစ်နိုင်ငံကထောက်ခံထားပေမယ့် အမေရိကန်အစိုးရကတော့ ငြင်းဆန်ခြင်းမရှိသလိုထောက်ခံခြင်းလည်းမရှိကြောင်းသိရပါတယ်။