ရောင်နီ (NSS) - ဩဂုတ် ၁၉

      ဆိုရှယ်မီဒီယာ စီမံခန့်ခွဲမှု ပလက်ဖောင်း Hopper HQ မှထုတ်ပြန်တဲ့ နောက်ဆုံးရစာရင်းများအရ Instagram မှာ K-pop မိန်းကလေးအဖွဲ့ Blackpink မှ ထိုင်းအဆိုတော် လီဆာဟာ အာရှနာမည်ကျော်တွေထဲမှာ follower အများဆုံးထဲက တစ်ယောက်ဖြစ်နေပြီး ၎င်းရဲ့အင်စတာဂရမ်ပိုစ့်တွေအတွက် တစ်ပိုစ့်ကို အမေရိကန်ဒေါ်လာ ၅၇၅၀၀၀ ထိ ရရှိနေတယ်လို့ သိရပါတယ်။ 

ကမ္ဘာ့ကြွယ်ဝအချမ်းသာဆုံး နာမည်ကျော်များ အဆင့်မှာ အဆင့် ၂၆ နေရာမှာရှိနေတဲ့ လီဆာဟာ အာရှဖျော်ဖြေရေး အနုပညာရှင်များစာရင်းမှာ အမြင့်ဆုံးအဆင့်ကို ရောက်ရှိနေပြီး  သူမရဲ့ အင်စတာဂရမ် Follower ဟာ ၉၆.၆ သန်းကျော်ထိ ရှိပါတယ်။ ၎င်းရဲ့နောက်မှာတော့ အိန္ဒိယမင်းသမီး ပရီရန်ကာချိုပရာ က ပိုစ့်တစ်ခုကို အမေရိကန်ဒေါ်လာ ၅၃၂,၀၀၀ နဲ့ အဆင့် ၂၉ နေရာမှာ ရပ်တည်နေပါတယ်။ ၎င်းရဲ့နောက်မှာ တောင်ကိုရီးယား မင်းသား လီမင်ဟိုက ပိုစ့်တစ်ခုကို အမေရိကန်ဒေါ်လာ ၂၀၀,၀၀၀ နဲ့ အဆင့် ၅၅ မှာ ရပ်တည်နေပါတယ်။  ၎င်းရဲ့ တွဲဖက် K-drama မင်းသမီး ဆောင်းဟေကိုကတော့ ပိုစ့်တစ်ခုကို အမေရိကန်ဒေါ်လာ ၁၀၀၀၀၀ နဲ့ အဆင့် ၉၃ မှာ ရပ်တည်နေပါတယ်။ 

        စာရင်းမှာ ထိပ်ဆုံး နံပါတ် ၁ နေရာကို ရရှိထားသူကတော့ ပေါ်တူဂီဘောလုံးကြယ်ပွင့် ခရစ္စတီယာနို ရော်နယ်ဒိုဖြစ်ပြီး ၎င်းရဲ့ အင်စတာဂရမ်ပိုစ့် တစ်ခုစီဟာ အမေရိကန်ဒေါ်လာ ၃.၂ သန်း ထိရှိပါတယ်။ ဒုတိယနေရာမှာတော့ ဘောလုံးကြယ်ပွင့် လီယွန်နယ်မက်ဆီက ပိုစ့်တစ်ခုကို အမေရိကန်ဒေါ်လာ ၂.၆ သန်းနဲ့ ရပ်တည်နေပါတယ်။ တတိယနေရာမှာတော့ အမေရိကန်အဆိုတော်-မင်းသမီး ဆယ်လီနာဂိုမက်ဇ်က ပိုစ့်တစ်ခုကို အမေရိကန်ဒေါ်လာ ၂.၅၆ သန်းနဲ့ တတိယနေရာမှာ ရပ်တည်နေပါတယ်။