စော(NSS) - ဩဂုတ် ၁၈

ရန်ကုန်တိုင်း၊  မင်္ဂလာဒုံမြို့နယ် နှင့် လှည်းကူးမြို့ အစပ်၊ ဆင်ဖုံချောင်းတွင် ပုပ်ပွနေသော အမျိုးသားအလောင်း တစ်လောင်းတွေ့ရှိခဲ့ကြောင်း သိရသည်။

အဆိုပါအလောင်းကို  ယနေ့(ဩဂုတ်လ ၁၈ရက်)၊ ညနေ (၃)နာရီခွဲအချိန်တွင် အထက်ပါကဲ့သို့ တွေ့ရှိခဲ့ခြင်းဖြစ်ကြောင်း ပုလဲအရန်မီးသတ်တပ်ဖွဲ့ထံမှ သိရသည်။

“အလောင်းကမျောလာတာပေါ့။ အဲဒီနားမှာငါးမျှားနေတဲ့ကလေးတွေက အပုပ်နံရလို့ဆိုပြီး လိုက်ရှာရင်းနဲ့တွေ့တာပါ။ ကျွန်တော်တို့ ကြည့်တာတော့ ပြင်ပဒဏ်ရာတော့မတွေ့ဘူး။ ရဲကလည်းမရောက်သေးတော့ မစစ်ဆေးရသေးဘူး။ အလောင်းကတစ်ပတ်လောက်ရှိမယ်”ဟု ပုလဲအရန်မီးသတ်တပ်ဖွဲ့မှ တာဝန်ရှိသူတစ်ဦးက NP News ကိုပြောသည်။

အလားတူ ယနေ့(ဩဂုတ်လ ၁၈ ရက်)၊ နံနက်(၇)နာရီဝန်းကျင်အချိန်တွင် မန္တလေးတိုင်း၊ မိတ္ထီလာမြို့၊ ဓမ္မသုခရွှေစည်းခုံဘုရားအနီးတွင် အသက် (၃၀)ဝန်းကျင်အမျိုးသားအလောင်းတစ်လောင်းကိုတွေ့ရှိခဲ့ကြောင်း မျိုးဆက်သစ်မြတ်ပါရမီအသင်းထံမှသိရသည်။

ထို့ပြင် ပြီးခဲ့သည့် (ဩဂုတ်လ ၁၆ ရက်)၊ ညနေပိုင်းတွင် ရန်ကုန်တိုင်း၊ ပန်းပဲတန်းမြို့နယ်၊ ပန်းဆိုးတမ်းဆိပ်ကမ်းတွင် အသက်(၄၀)ဝန်းကျင်အလောင်းတစ်လောင်း ရေနစ်သေဆုံးနေကြောင်း သိရသည်။