ဂျန်ဇက် (NSS) - သြဂုတ် ၁၈

ယူကရိန်းအစိုးရဟာ ရုရှားနဲ့ဖြစ်ပွားလျက်ရှိနေတဲ့ စစ်ပွဲကို ဆက်တိုက်ဖို့ ရွေးချယ်ခဲ့မယ်ဆိုရင် ၎င်းရဲ့ပိုင်နက် အားလုံးဆုံးရှုံးသွားရဖွယ်ရှိနေကြောင်း ဘီလာရုစ့်သမ္မတလူကာရှန်ကို က သတိပေးပြောဆိုလိုက်ပါတယ်။ 

ယူကရိန်းဟာစစ်ပွဲကို ဆက်တိုက်နေခြင်းထက် နိုင်ငံကို ထိန်းသိမ်းနိုင်ဖို့ လုပ်ဆောင်သင့်ကြောင်း၊ စစ်ပွဲကို ဆက်တိုက်မယ်ဆိုရင် ပိုမိုဆုံးရှုံးလာမှာဖြစ်ကြောင်း ဘီလာရုစ့်သမ္မတ က ပြောပါတယ်။ ဘီလာရုစ့်သမ္မတ လူကာရှန်ကိုဟာ ယူကရိန်းသတင်းထောက်  Diana Panchenko နဲ့ ပြီးခဲ့တဲ့ရက်ပိုင်းမှာပြုလုပ်တဲ့ အင်တာဗျူး အတွင်း အခုလိုမျိုးပြောခဲ့တာဖြစ်ပါတယ်။

သမ္မတလူကာရှန်ကိုက "ပထမအဆင့်က စစ်ပွဲကို အဆုံးသတ်ရမှာဖြစ်တယ်။ ယူကရိန်းဟာ ပိုင်နက်တွေ ပြန်လည် ရယူနိုင်ဖို့ ရုန်းကန်ရဖွယ်ရှိနေတယ်။ သိမ်းပိုက်ခံထားရတဲ့ပိုင်နက်တွေကို စွန့်လွှတ်ပါလို့ ယူကရိန်းကိုမပြောချင်ပါ ဘူး။ ဒါပေမယ့်ယူကရိန်းဟာ ပိုင်နက်တွေကို ပြန်လည်ရယူနိုင်ဖို့ စစ်ပွဲကို ဆက်တိုက်မယ်ဆိုရင် သူတို့တွေဟာ ပိုင်နက်တွေကို လက်ရှိထက် ပိုမိုဆုံးရှုံးရဖွယ်ရှိနေတယ်။ ရုရှားတပ်ဖွဲ့တွေဟာ ရှေ့တန်းစစ်မျက်နှာပြင်မှာရှိနေတဲ့ ယူကရိန်းစစ်တပ်ကို ဖျက်ဆီးနိုင်စွမ်းရှိပါတယ်။ ရုရှားဟာ အိုဒက်ဆာကို သိမ်းယူပြီး ယူကရိန်းကို ပင်လယ် ထွက်ပေါက်နဲ့ အဆက်အသွယ်ပြတ်အောင် လုပ်ဆောင်လို့ရပါတယ်" လို့ပြောပါတယ်။

ယူကရိန်းဟာ ဆိုဗီယက်ပြည်ထောင်စုက ခွဲထွက်ပြီးနောက် သတ်မှတ်ခဲ့တဲ့ ၎င်းတို့နိုင်ငံ ပိုင်နက်မြေပုံအတိုင်း ပြန်လည်ရယူဖို့ ကြိုးပမ်းနေပေမယ့် မျှော်လင့်ထားသလိုမဖြစ်ဘဲ ရှိနေပါတယ်။ ရုရှားဟာ ယူကရိန်းပိုင်နက်တွေ ဖြစ်တဲ့ ဒွန်းညက်စ်၊ လူဟန်စ့်၊ ခါဆွန် နဲ့ ဇာပိုရိုဟီဒေသတွေကို သိမ်းယူထားပြီး ရုရှားနဲ့ပူးပေါင်းဖို့ ဆန္ဒခံယူပွဲပြုလုပ် ကာ ရုရှားပိုင်နက်အဖြစ် သတ်မှတ်ထားပါတယ်။ 

ယူကရိန်းတပ်ဖွဲ့တွေဟာ စစ်ပွဲကို ဆက်လက်တိုက်နေမယ်ဆိုရင် ယူကရိန်းဆိုတာရှိတော့မှာ မဟုတ်ဘူးဆိုတာ သိစေလိုကြောင်း ဘီလာရုစ့်သမ္မတလူကာရှန်ကို က ပြောပါတယ်။ ရုရှားဟာ ယူကရိန်းနဲ့ပတ်သက်ပြီး ၎င်းရဲ့အဓိကရည်ရွယ်ချက်များကို ရရှိထားပြီးဖြစ်ကြောင်း၊ ရုရှားဟာ ၎င်းရဲ့နယ်စပ်နားမှာ ရန်လို၊ ရန်စမှုတွေကို လက်ခံလိုတဲ့နိုင်ငံမျိုး မဟုတ်ကြောင်း ဘီလာရုစ့်သမ္မတ က ပြောပါတယ်။