ယွန်း (NSS) - သြဂုတ် ၁၂

ပုသိမ်လေယာဥ်ကွင်းအား နိုင်ငံတကာမှ လေယာဥ်များဆင်းသက်နိုင်သည်အထိ အဆင့်မြှင့်တင်ခြင်းများ ဆောင်ရွက်သွားမည်ဖြစ်ကြောင်း နစက ဥက္ကဋ္ဌက အသိပေးပြောကြားထားသည်။

နစကဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်က သြဂုတ်လ(၁၀)ရက်တွင် ပုသိမ်မြို့ရှိ အစိုးရအဖွဲ့ရုံး၌ ဒေသဖွံ့ဖြိုးတိုးတက်ရေးအတွက် ဒေသခံများနှင့် တွေ့ဆုံစဥ်အထက်ပါကဲ့သို့ ပြောကြားခဲ့ခြင်းဖြစ်သည်။

ပုသိမ်လေယာဥ်ကွင်းအား အဆင့်မြှင့်တင်ခြင်းများ ‌ဆောင်ရွက်သွားမည်ဖြစ်ပြီး နိုင်ငံတကာမှ လေယာဥ်များဆင်းသက်နိုင်သည်အထိ ဆောင်ရွက်သွားမည်ဖြစ်ကြောင်း နစကဥက္ကဋ္ဌက ပြောသည်။

ထို့ပြင် ပုသိမ်- ရန်ကုန်ကားလမ်းပိုင်းတွင်လည်း နေ့စဥ်ယာဥ်အစီးပေါင်းများစွာ ဖြတ်သန်းလျက်ရှိပြီး နိုင်ငံတကာစံနှုန်းသတ်မှတ်ချက်များတွင် နေ့စဥ်ယာဥ်အစီးရေ သွားလာမှုပေါ်မူတည်၍ လမ်းများကို အဆင့်မြှင့်တင်ရခြင်းကြောင့် အဆင့်မြှင့်တင်ပေးနိုင်ရေးကိုလည်း ဆောင်ရွက်လျက်ရှိကြောင်း သိရသည်။

ဧရာဝတီတိုင်းသည် ခရီးသွားလာရေးလုပ်ငန်းဆောင်ရွက်ရန်အတွက် သဘာဝအလှအပများ၊ ဒေသထွက်အစားအသောက်များနှင့် အခြားအခြေခံကောင်းများကို ပိုင်ဆိုင်ထားသည့် ဒေသတစ်ခုဖြစ်ကြောင်း သိရသည်။

ထို့ကြောင့် ပုသိမ်မြို့၏ လူနေမှုစနစ်မြှင့်တင်ရေးနှင့် ယာဥ်စည်းကမ်း၊ လမ်းစည်းကမ်းများ စနစ်တကျဖြစ်ရန် တာဝန်ရှိသူများက ကြပ်မတ်ဆောင်ရွက်ရေးကိုလည်း နစကဥက္ကဋ္ဌက တိုက်တွန်းပြောကြားခဲ့သည်။

နစက ဥက္ကဋ္ဌအနေဖြင့် ပြီးခဲ့သည့် ဧပြီလအတွင်းကလည်း ပြည်တွင်း၊ ပြည်ပ ခရီးသွားများ ဝင်ရောက်မှုများပြားသည့် ရခိုင်ပြည်နယ်ရှိ သံတွဲလေယာဥ်ကွင်းကိုလည်း ဂျက်လေယာဥ်များ ဆင်းသက်နိုင်သည်အထိ အဆင့်မြှင့်တင်ဆောင်ရွက်ရန် အသိပေးပြောကြားထားသည်။

အလားတူ စစ်တွေလေယာဥ်ကွင်းသည်လည်း ရခိုင်ပြည်နယ်၏ မြို့တော်လေယာဥ်ကွင်းဖြစ်ခြင်းကြောင့် A-320 ၊ B-737 လေယာဥ်များဆင်းသက်နိုင်မည့် လေယာဥ်ပြေးလမ်းတိုးချဲ့ခြင်း နှင့် လေဆိပ်တိုးချဲ့အ ဆင့်မြှင့်တင်ဆောင်ရွက်ခြင်းကို အဆင့်လိုက် ဦးစားပေးဆောင်ရွက်သွားမည်ဖြစ်ကြောင်း သိရသည်။