NSS - ဩဂုတ် ၁၁

ရန်ကုန်၊ မန္တလေးမြို့များမှ ရုရှားနိုင်ငံ နိုဗိုဆီဗရစ်မြို့သို့ တိုက်ရိုက်လေကြောင်းပျံသန်းမှုကို စက်တင် ဘာလ ၅ ရက်မှ စတင်ပြေးဆွဲသွားမည်ဖြစ်ကြောင်း Myanmar Airway International (MAI) က အသိပေးကြေညာထားသည်။ 

မြန်မာ-ရုရှား တိုက်ရိုက်လေကြောင်းခရီးစဉ်ကို အပတ်စဉ် အင်္ဂါနေ့နှင့် စနေ့နေ့တို့တွင် ပျံသန်းပြေးဆွဲသွားမည်ဖြစ်ပြီး လေယာဉ်လက်မှတ်ခနှုန်းထားအဖြစ် အမေရိကန်ဒေါ်လာ ၄၀၉ ဒေါ်လာ သတ်မှတ်ထားကြောင်း သိရသည်။

ဇွန်လအတွင်း ရုရှားနိုင်ငံတွင်ပြုလုပ်ခဲ့သည့် SPIEF-2023 နိုင်ငံတကာစီးပွါးရေးဖိုရမ်တွင် ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေး ဝန်ကြီးဌာန ပြည်ထောင်စုဝန်ကြီး ဒေါက်တာကံဇော်က ရုရှားနှင့် မြန်မာနိုင်ငံအကြား တိုက်ရိုက်လေကြောင်းပျံသန်းမည်ဖြစ်ကြောင်း အသိပေးပြောကြားခဲ့သည်။

MAI ၏ ထုတ်ပြန်ချက်တွင် လေကြောင်းခရီးစဉ်သစ်သည် ပြည်တွင်းမှ နာမည်ကြီးခရီးစဉ်များဖြစ်သည့် ငပလီ ၊ ဟဲဟိုး၊ ပုဂံ၊ ညောင်ဦးခရီးစဉ်များနှင့် ချိတ်ဆက်ပေးသွားရန် စီစဉ်ထားကြောင်း ဖော်ပြထားသည်။ 

ယမန်နှစ်မှစတင်ကာ ရုရှားနိုင်ငံသား ခရီးသွားများအတွက် နကစမှ ဗီဇာဖြေလျှော့မှုများ ပြုလုပ်ပေးခဲ့ပြီး ရုရှားနိုင်ငံဘက်ကလည်း မြန်မာခရီးသွားများအတွက် အလားတူ ဗီဇာဖြေလျှော့ပေးရန် တောင်းဆိုထားကြောင်းသိရသည်။