NSS - ဩဂုတ် ၈

လျှပ်စစ် သုံးဘီးတစ်စီးလျှင် ငွေကျပ် သိန်း(၃ဝ)ဝန်းကျင်သာရှိခြင်းကြောင့် ဈေးကွက်အတွင်း၌ လျှပ်စစ်သုံးဘီးဆိုင်ကယ်များကို ဝယ်ယူသူများပြားနေကြောင်းသိရသည်။

“အဓိကနယ်ဘက်တွေက အဝယ်များတယ် မီနီအိုးဝေ တစ်စီးကို သိန်းတစ်ရာကျော်နေတော့။ လျှပ်စစ်ဘီးတွေကိုစိတ်ဝင်စားလာကြတာပေါ့။ ပုဂံ၊မန္တလေး နဲ့ အထက်မြန်မာပြည်က ပိုဝယ်ကြတယ်။ ရန်ကုန်မှာတော့ ဆိုင်ကယ်မူဝါဒ တိတိကျကျမရှိလို့  အဝယ်နည်းတယ်။ ဒါတောင် တချို့မြို့နယ်တွေက ရန်ကုန်လိုင်စင်ရလားဆိုပြီးလာမေးနေတာတွေလည်းရှိပါတယ်"ဟု လျှပ်စစ်မော်တော်ယာဉ်တင်သွင်းရောင်းချသူတစ်ဦးက ပြောသည်။

အမျိုးသားအဆင့် လျှပ်စစ်သုံးယာဉ်နှင့် ဆက်စပ်လုပ်ငန်းများ ဖွံ့ဖြိုးတိုးတက်ရေး ဦးဆောင်ကော်မတီ၏ ခွင့်ပြုချက်ဖြင့် ၂၀၂၃ ခုနှစ်၊ ဇန်ဝါရီလမှ စတင်ကာ လျှပ်စစ်သုံးယာဉ်အမျိုးမျိုးကို တင်သွင်းခဲ့ရာ လက်ရှိအချိန်ထိ လျှပ်စစ်ကား ၅၇၉ စီး၊ လျှပ်စစ်သုံးဘီးယာဉ်နှင့် လျှပ်စစ်ဆိုင်ကယ် ၂၄၅၄ စီး၊ စုစုပေါင်း လျှပ်စစ်သုံးယာဉ်အမျိုးမျိုး ၃၀၃၃ စီကို မှတ်ပုံတင်ခွင့်ပြုထားကြောင်း ကုန်းလမ်းပို့ဆောင်ရေးညွှန်ကြားမှုဦးစီးဌာန၏ စာရင်းများအရ သိရသည်။

ပြည်တွင်း၌ လောင်စာဆီသုံး သုံးဘီးယာဉ်တစ်စီး၏ ပေါက်ဈေးသည် ကျပ်သိန်းတစ်ရာ့ငါးဆယ်ကျော် ပေါက်ဈေး ရှိနေပြီး လျှပ်စစ်သုံးဘီးယာဉ်သည် ကျပ်သိန်းသုံးဆယ်ကျော်သာရှိသဖြင့် မြို့နယ်အချို့တွင် သုံးဘီးပြေးဆွဲနေသည့်သူများက လျှပ်စစ်သုံးဘီးယာဉ်ကို စိတ်ဝင်စားကြကြောင်း သိရသည်။