မျိုးကြီး (NSS) - သြဂုတ် ၈

EAO အချို့က NCA ကို မလိုက်နာဘဲ အကြမ်းဖက်လုပ်ရပ်များ၌ ပါဝင်ဆောင်ရွက်ခြင်းကြောင့် PDF အဖွဲ့များ၏ လုပ်ရပ်များ ပိုမိုဆိုးရွားလာခဲ့ကြောင်း တပ်ချုပ်က ပြောသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ယမန်နေ့(သြဂုတ်လ ၇ ရက်)တွင် နေပြည်တော်ရှိ နစကဥက္ကဋ္ဌရုံး၌ အသစ်ဖွဲ့ပြန်လည်ဖွဲ့စည်းထားသည့် နစကအဖွဲ့ဝင်များနှင့်တွေ့ဆုံစဉ် အထက်ပါကဲ့သို့ ထည့်သွင်းပြောကြားခဲ့ခြင်းဖြစ်သည်။

CRPH၊ NUG နှင့် PDF အဖွဲ့များသည် လက်နက်ကိုင်အကြမ်းဖက် လမ်းစဉ်များကို ရွေးချယ်ခဲ့ပြီး PDF များအနေဖြင့် EAO အဖွဲ့အချို့၏ ကူညီအားပေးမှုနှင့် အထောက်အပံ့များကို ရယူကာ လက်နက်ကိုင်အကြမ်းဖက်မှုများကို လုပ်ဆောင်ခဲ့ကြကြောင်း နစကဥက္ကဋ္ဌက ပြောသည်။

တပ်မတော်အနေဖြင့် တိုင်းရင်းသားလက်နက်ကိုင်အဖွဲ့များနှင့် ငြိမ်းချမ်းရေးသဘောတူညီချက်ရရှိရေးအတွက် ယခင်ကတည်းက NCA အပေါ်အခြေခံကာ ဆောင်ရွက်ခဲ့ကြောင်းနှင့် လက်ရှိတွင်လည်း ဆောင်ရွက်နေကြောင်း ၎င်းက ထပ်မံပြောသည်။

သို့သော် အချို့သော EAO အဖွဲ့များအနေဖြင့် NCA သဘောတူညီချက်များကို လိုက်နာခြင်းမရှိဘဲ အကြမ်းဖက်လုပ်ရပ်များတွင် ပါဝင်ဆောင်ရွက်ခြင်းကြောင့် PDF အဖွဲ့များ၏ အကြမ်းဖက်လုပ်ရပ်များမှာ ပိုမိုဆိုးရွားလာခဲ့ကြောင်း ဗိုလ်ချုပ်မှူးကြီး မင်းအောင်လှိုင်က ပြောသည်။

ထို့ကြောင့် အချို့သောဒေသများ၌ တည်ငြိမ်အေးချမ်းမှု၊ တရားဥပဒေစိုးမိုးမှုနှင့် ဖွံ့ဖြိုးတိုးတက်မှုများ ဆောင်ရွက်ရာတွင် နှောင့်နှေးကြန့်ကြာမှုများ ရှိခဲ့သည်ဟု ပြောသည်။

PDF အဖွဲ့နှင့် အချို့သော EAO အဖွဲ့များ၏ လုပ်ဆောင်မှုများကြောင့် တိုင်းရင်းသားဒေသများ၌ တည်ငြိမ်အေးချမ်းရေး၊ တရားဥပဒေစိုးမိုးရေးနှင့် ဒေသဖွံ့ဖြိုးတိုးတက်ရေးတို့ကို ထိခိုက်နေသည့်အပြင် ကျောင်းသား၊ ကျောင်းသူများ၏ ပညာသင်ကြားမှု အခွင့်အရေးများမှာလည်း ထိခိုက်ဆုံးရှုံးနေကြောင်း နစကဘက်က ပြောသည်။

နိုင်ငံတော် တည်ငြိမ်အေးချမ်းရေးနှင့် တရားဥပဒေစိုးမိုးရေးကို မဖြစ်မနေဆောင်ရွက်သွားကြရမည်ဟုလည်း ဗိုလ်ချုပ်မှူးကြီးမင်းအောင်လှိုင်က နစကအဖွဲ့ဝင်များကို တိုက်တွန်းပြောကြားခဲ့သည်။

NCA ရေးထိုးထားသည့် တိုင်းရင်းသားလက်နက်ကိုင်အဖွဲ့များဖြစ်သော KNU၊ CNF နှင့် ABSDF တို့သည် နစကဥက္ကဋ္ဌ ဖိတ်ခေါ်သည့် ငြိမ်းချမ်းရေးဆွေးနွေးပွဲသို့ မတက်ရောက်ခဲ့သည့်အပြင် တပ်မတော်နှင့်လည်း ထိတွေ့တိုက်ပွဲများ ဖြစ်ပွားလျက် ရှိနေသည်။