စော(NSS) - ဩဂုတ် ၇

ဟိုတယ်နှင့် ခရီးသွားလာရေးဝန်ကြီးဌာန လက်အောက်တွင် လစ်လပ်လျက်ရှိသော ရာထူးနေရာ (၆၄) နေရာအတွက် လျှောက်လွှာများခေါ်ယူနေကြောင်း သိရသည်။

ဟိုတယ်နှင့် ခရီးသွားလာရေးဝန်ကြီးဌာနမှ ယနေ့(ဩဂုတ်လ ၇ ရက်)ထုတ် နိုင်ငံပိုင်သတင်းစာများတွင် အထက်ပါကဲ့သို့အသိပေးကြေညာထားခြင်းဖြစ်သည်။

အဆိုပါ ရာထူး (၆၄)နေရာအနက် အငယ်တန်းစာရေးရာထူးကို ဝန်ကြီးရုံးအတွက် (၂)နေရာနှင့် ဟိုတယ်နှင့်ခရီးသွားညွှန်ကြားမှုဦးစီးဌာနအတွက် (၄၇)နေရာနှင့် ဗီဒီယိုကျွမ်းကျင်(၄)ကို ဝန်ကြီးရုံးအတွက် (၁)နေရာခန့်အပ်သွားမည် ဖြစ်ကြောင်းသိရသည်။

အလားတူ ယာဉ်မောင်း(၄)ရာထူးကို ဝန်ကြီးရုံးအတွက် (၃)နေရာ၊ ရုံးအကူရာထူးကို ဝန်ကြီးရုံးအတွက် (၁)နေရာ နှင့် ဟိုတယ်နှင့်ခရီးသွားညွှန်ကြားမှုဦးစီးဌာနအတွက် (၈)နေရာ နှင့် လုပ်သားရာထူးကိုဟိုတယ်နှင့်ခရီးသွား ညွှန်ကြားမှုဦးစီးဌာနအတွက် (၂)နေရာ ခန့်အပ်သွားမည်ဖြစ်ကြောင်း သိရသည်။ 

လျှောက်ထားသူများသည် စက်တင်ဘာလ (၆)ရက်တွင် အသက် (၁၈)နှစ်ပြည့်ရန်လိုအပ်ပြီး အသက် (၃၀)နှစ်ထက်မကျော်လွန်သူဖြစ်ရန်လိုအပ်ကြောင်း ထုတ်ပြန်ထားသည်။

လျှောက်လွှာများကို ဟိုတယ်နှင့်ခရီးသွားလာရေးဝန်ကြီးဌာန၊ နေပြည်တော်၊ ရုံးအမှတ် (၃၃)နှင့် မိမိတို့နီးစပ်ရာ တိုင်းဒေသကြီးနှင့် ပြည်နယ်ရုံးများသို့ စက်တင်ဘာလ (၆)ရက်နောက်ဆုံးထား ပေးပို့ရမည်ဖြစ်ကြောင်း ထုတ်ပြန်ချက်တွင် ပါရှိသည်။

‌အဆိုပါလျှောက်လွှာများတွင်  သတ်မှတ်ချက်နှင့်ပြည့်သူများကို အငယ်တန်းစာရေးရာထူးအတွက် အင်္ဂလိပ်စာနှင့် ခရီးသွားလုပ်ငန်းဆိုင်ရာ အထွေထွေဗဟုသုတနှင့် IT ဆိုင်ရာအသုံးပြုမှုတို့ကို ရေးဖြေစာမေးပွဲနှင့် လူတွေ့စစ်ဆေးသွားမည်ဖြစ်ကြောင်း ထုတ်ပြန်ထားသည်။

ထို့ပြင် ဗီဒီယိုကျွမ်းကျင်(၄)နှင့် ယာဉ်မောင်း (၄)ရာထူးများအတွက် လူတွေ့အပြင် ဗီဒီယိုဆိုင်ရာကျွမ်း ကျင်မှုစစ်ဆေးခြင်းနှင့် ယာဉ်မောင်းကျွမ်းကျင်မှုစစ်ဆေးသွားမည်ဖြစ်ပြီး ကျန်ရာထူးအတွက် လူတွေ့စစ်ဆေးသွားမည်ဖြစ်ကြောင်း သိရသည်။