စော(NSS) - ဩဂုတ် ၇

ရန်ကုန်တိုင်း၊ သာကေတမြို့နယ်တွင် ရပ်ထားသော အငှားယာဉ်အား အိမ်စီးကားမှ ဝင်တိုက်မိ၍ အမျိုးသားနှစ်ဦး ထိခိုက်ဒဏ်ရာရရှိခဲ့ကြောင်း သိရသည်။

ဖြစ်စဉ်မှာ ယမန်နေ့(ဩဂုတ်လ ၆ရက်)၊ ညနေ (၆)နာရီအချိန်တွင် သာကေတမြို့နယ်၊ ရှုခင်းသာလမ်းမကြီး၊ အောင်ဇေယျလမ်းထိပ်တွင် အထက်ပါကဲ့သို့ဖြစ်ပွားခဲ့ခြင်းဖြစ်ကြောင်း သာကေတမြို့နယ်လူမှုကူညီရေးအဖွဲ့ထံမှ သိရသည်။

“TAXI ကားကလူတွေက ကားကိုရပ်ပြီးတော့  နောက်ဖုံးဖွင့်ပြီး ခြေထောက်တွေတွဲလောင်းချပြီး ထိုင်နေကြတာပါ။ အဲဒီအချိန်မှာ အိမ်စီးကားက အရှိန်လွန်ပြီး လာတိုက်တာပါ။ TAXI ကားက အမျိုးသားနှစ်ယောက်ထိခိုက်ဒဏ်ရာရသွားတာပေါ့”ဟု သာကေတမြို့နယ်လူမှုကူညီရေးအဖွဲ့မှ တာဝန်ရှိသူတစ်ဦးက NSS ကိုပြောသည်။

ယာဉ်တိုက်မှုကြောင့် အသက် (၄၅)ဝန်းကျင်အရွယ်ရှိ အမျိုးသားတစ်ဦးသည် ခြေထောက်ပြတ်ရှဒဏ်ရာနှင့် အသက်(၄၀)ဝန်းကျင်အရွယ်ရှိ အမျိုးသားတစ်ဦးသည် ခြေထောက်ကျိုးခဲ့ကြောင်း သိရသည်။

အဆိုပါ အမျိုးသားနှစ်ဦးအား မြေပြင်ကုသမှုပေးခဲ့ပြီး ရန်ကုန်ပြည်သူ့ဆေးရုံကြီးသို့ ပို့ဆောင်ပေးခဲ့ကြောင်း သိရသည်။