NSS - သြဂုတ် ၅

ဧရာဝတီတိုင်း၊ လပွတ္တာမြို့နယ်ရှိ ပင်လယ်ပြင်၌ စက်လှေတစ်စီးပေါ်တွင် လိုက်ပါလာသော ဘင်္ဂါလီ (၇၂)ဦးကို ဖမ်းဆီးထိန်းသိမ်းထားကြောင်း သတင်းရရှိသည်။

စက်လှေတစ်စီးနှင့်အတူ ဘင်္ဂါလီလူမျိုး (၇၂)ဦးကို ယမန်နေ့(သြဂုတ်လ ၄ ရက်)၊ နံနက် ၁၀ နာရီကျော်အချိန်တွင် လပွတ္တာမြို့နယ်၊ ပြင်စလူမြို့၊ ကိုင်းသောင်ကျေးရွာနှင့် (၄)မိုင်ခန့်အကွာရှိ ပင်လယ်ပြင်၌ ဖမ်းဆီးရမိခဲ့ခြင်းဖြစ်ကြောင်း လုံခြုံရေးအဖွဲ့နှင့်နီးစပ်သူများက ပြောသည်။

အဆိုပါ ဘင်္ဂါလီ (၇၂)ဦးသည် ဘင်္ဂလားဒေ့ရှ်နိုင်ငံမှတစ်ဆင့် ထွက်ခွာလာခြင်းဖြစ်ပြီး မြန်မာနိုင်ငံ ပိုင်နက်သို့ဖြတ်ကျော်ကာ မလေးရှားနိုင်ငံသို့သွားရောက်ရန် စီစဉ်ထားခြင်းဖြစ်ကြောင်း သိရှိရသည်။

ထိုသို့ထွက်ခွာလာစဉ်အချိန်တွင် လပွတ္တာမြို့နယ်အတွင်းရှိ ပင်လယ်ပြင်၌ စက်လှေပျက်ခဲ့သည့်အတွက် (၅)ရက်ကြာ ပင်လယ်ပြင်၌မျောနေခဲ့ပြီး ၎င်းစက်လှေအား မသင်္ကာ၍ လုံခြုံရေးပူးပေါင်းအဖွဲ့က သွား ရောက်စစ်ဆေးစဉ် အထက်ပါကဲ့သို့ ဖမ်းမိခဲ့ခြင်းဖြစ်ကြောင်း သိရသည်။

၎င်းကဲ့သို့ ဖမ်းဆီးခြင်းခံခဲ့ရသူများထဲတွင် ဘင်္ဂါလီအမျိုးသား (၆၇)ဦးနှင့် အမျိုးသမီး (၅)ဦး စုစုပေါင်း (၇၂)ဦး ပါရှိကြောင်း လုံခြုံရေးအဖွဲ့နှင့်နီးစပ်သူများက ပြောသည်။

လက်ရှိတွင် ဘင်္ဂါလီ(၇၂)ဦးအား သက်ဆိုင်ရာရဲစခန်း၌ ထိန်းသိမ်းကာ စစ်ဆေးမေးမြန်းမှုများ ပြုလုပ်လျက်ရှိပြီး လဝက ဥပဒေဖြင့် အရေးယူရန်အတွက် စီစဉ်လျက်ရှိကြောင်း သိရသည်။