NSS - ဩဂုတ် ၅

အမဲသားသွားရောင်းသည့် အုပ်ချုပ်ရေးမှူးကို PDF အဖွဲ့က သေနတ်ဖြင့် ပစ်ခတ်သတ်ဖြတ်မှု မကွေး တိုင်း၊ နတ်မောက်မြို့တွင် ဖြစ်ပွားခဲ့ကြောင်း ရဲတပ်ဖွဲ့မှ ထုတ်ပြန်ထားသည်။

ဖြစ်စဥ်မှာ ဩဂုတ်လ ၃ ရက်၊ နံနက် ၁၁နာရီ ၁၀မိနစ်အချိန်တွင် နတ်မောက်မြို့နယ်၊ ကျွန်းတောကျေးရွာအနီး ရွာမွန်-ကျောက်ပန်းတောင်းသွားကားလမ်းတွင် ဖြစ်ပွားခဲ့ကြောင်း ရဲတပ်ဖွဲ့မှ ထုတ်ပြန်ထားသည်။

အဆိုပါ သေဆုံးသူအမျိုးသားသည် ဒန့်တလွန်ပင်ကျေးရွာမှ ရွှေပန်းတောကျေးရွာသို့ အမဲသားသွားရောင်းရန် ဆိုင်ကယ်ဖြင့် လမ်းအတိုင်းမောင်းနှင်လာစဉ် ကျွန်းတောကျေးရွာအနီး မိုင်တိုင်အမှတ် ၉မိုင် ၂ဖာလုံနှင့် ၃ဖာလုံအကြား အရောက်တွင် PDF အဖွဲ့အင်အား ၂ဦးမှ ဆိုင်ကယ်တစ်စီးဖြင့် လိုက်ပါလာပြီး သေနတ်ဖြင့် ပစ်ခတ်သွားခဲ့ကြောင်း သိရသည်။

ထိုသို့ သေနတ်ဖြင့် ပစ်ခတ်ခံရမှုကြောင့် ဒန့်တလွန်ပင်ကျေးရွာ အုပ်ချုပ်ရေးမှုး ဦးဒေါင်းတင်(၅၆)နှစ်၏ နဖူး၊ ရင်ဘက်တို့တွင် ကျည်ဖောင်ဝင်ဒဏ်ရာ (၄)ချက်ဖြင့် အခင်းဖြစ်ပွားရာနေရာ၌ပင်သေဆုံးသွားခဲ့ကြောင်း သိရသည်။

အလားတူ ဩဂုတ်လ ၃ရက်၊ နံနက် ၉နာရီအချိန်တွင် စစ်ကိုင်းတိုင်း၊ မုံရွာမြို့နယ်၊ တောင်ပလူးကျေးရွာ မီးသင်္ဂြိုဟ်စက်အနီးတွင် အမျိုးသားတစ်ဦး သေနတ်ဖြင့် ပစ်သတ်ခံခဲ့ရကြောင်း လုံခြုံရေးတပ်ဖွဲ့ဝင်များနှင့် နီးစပ်သည့် သတင်းရင်းမြစ်က အသိပေးပြောကြားခဲ့သည်။

အဆိုပါသေဆုံးသူအမျိုးသားသည် ရင်ဘတ်နှင့်ကျောတို့တွင် ကျည်ဖောက်ဝင်ဒဏ်ရာ (၂)ချက်၊ လည်ကုတ်စုတ်ပြဲဒဏ်ရာ (၂)ချက်တို့ဖြင့် သေဆုံးနေပြီး ၎င်းအနီးမှ AUSA 380 AUTO စာသားပါ ကျည်ခွံ ၁ခုအား သိမ်းဆည်းရမိခဲ့ကြောင်း သိရသည်။

အထက်ပါဖြစ်စဉ်များမှ ကျူးလွန်ခဲ့သည့် အကြမ်းဖက်သမားများအား ဖော်ထုတ်ဖမ်းဆီး၍ ဥပဒေနှင့်အညီအပြစ်ပေးအရေးယူနိုင်ရေး လုပ်ဆောင်လျက်ရှိကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားသည်။