NSS - ဩဂုတ် ၃

ထိုင်းဗီဇာဝန်ဆောင်မှုလုပ်ငန်း လုပ်ကိုင်ရန်အတွက် ပြည်တွင်းခရီးသွားကုမ္ပဏီ ၂၃ ခုကို ထိုင်းသံရုံးက ခွင့်ပြုလိုက်ကြောင်း သံရုံးထုတ်ပြန်ချက်အရသိရသည်။ 

ထိုင်းဗီဇာယူရန်အတွက် ယခင်ကဲ့သို့ သံရုံးသို့ လူကိုယ်တိုင်သွားရောက် တန်းစီရန်မလိုတော့ဘဲ အထက်ပါ ခရီးသွားကုမ္ပဏီများမှတဆင့် ဗီဇာလျှောက်နိုင်ပြီ ဖြစ်ကြောင်းသိရသည်။

“ကျွန်မတို့ဆီကို စာရွက်စာတမ်း အစုံအလင်လာပေးထားရင် ၃ ရက်အတွင်းဗီဇာရအောင် လျှောက်ပေးပါတယ်။ လိုအပ်တာကတော့ မှတ်ပုံတင်မူရင်း၊ ပတ်စပို့စ်နဲ့ ငွေလက်ကျန် ၁၅ သိန်းရှိတဲ့ ဘဏ်စာအုပ်လိုပါတယ်။ သံရုံးကို သွင်းရတဲ့ဗီဇာကြေးက ဒေါ်လာ ၄၀၊ ဗီဇာဝန် ဆောင်မှုက တိုးရစ်ဗီဇာဆိုရင် ဒေါ်လာ ၃၀၊ စုစုပေါင်း ဒေါ်လာ ၇၀ ကျပါမယ်” ဟု ခရီးသွား ကုမ္ပဏီတစ်ခုမှ တာဝန်ရှိသူတစ်ဦးက ပြောသည်။

အဆိုပါ ဗီဇာဝန်ဆောင်မှုလုပ်ငန်းကို လုပ်ကိုင်နိုင်ရန် ပြည်တွင်းမှ ကုမ္ပဏီ ၄၀၀ ကျော် လျှောက်ထားသည့်အနက်မှ ကုမ္ပဏီ ၂၃ ခုကို ထိုင်းသံရုံးက ရွေးချယ်ခဲ့ခြင်းဖြစ်ပြီး ဗီဇာဝန် ဆောင်မှုဖြင့် လျှောက်ထားလိုပါက မိမိလျှောက်ထားလိုသည့် ဗီဇာကြေးအပေါ် မူတည်ပြီး ၃၅ ဒေါ်လာမှ ဒေါ်လာ ၂၀၀၀ အထိ ကျသင့်မည်ဖြစ်ကြောင်း သိရသည်။

ဗီဇာဝန်ဆောင်မှုပေးရာတွင် ကုမ္ပဏီမှ အစအဆုံး တာဝန်ယူဆောင်ရွက်ပေးသွားမည် ဖြစ်ပြီး နယ်မှဗီဇာလျှောက်ထားလိုသူများအတွက် အဆင်ပြေနိုင်ပြီး အထူးသဖြင့် ထိုင်းနိုင်ငံနှင့် နယ်နမိတ်ချင်း ထိစပ်နေသည့်မြို့များတွင် နေထိုင်သူများအတွက် ပိုမိုအဆင်ပြေနိုင်မည်ဖြစ် ကြောင်း သိရသည်။