Pika (NSS) - ဇူလိုင် ၂၂

မြောက်ကိုရီးယားသည် ဇူလိုင်လ(၂၂)ရက် နံနက်ပိုင်းတွင် ခရုဇ်ဒုံးကျည်အများအပြားကို စမ်းသပ်ပစ်လွှတ်ခဲ့ကြောင်း တောင်ကိုရီးယားပူးတွဲစစ်ဦးစီးချုပ်ရုံးက ထုတ်ပြန်ပြောကြားခဲ့သည်။ နှစ်ပေါင်း(၄ဝ)အတွင်း တောင်ကိုရီးယားဆိပ်ကမ်းသို့ အမေရိကန်၏ နျူကလီးယားစွမ်းအင်သုံး ရေငုပ်သင်္ဘောရောက်ရှိလာပြီးနောက် မြောက်ကိုရီးယားဖက်က အင်အားပြသသည့်အနေဖြင့် သီတင်းပတ်တစ်ပတ်အတွင်း ဒုတိယအကြိမ်မြောက် ထပ်မံ ပစ်လွှတ်ခဲ့ခြင်းဖြစ်သည်။ 

မြောက်ကိုရီးယားဖက်က ပစ်လွှတ်လိုက်သော ခရုဇ်ဒုံးကျည်များကို ဇူလိုင်လ(၂၂)ရက် နံနက်(၄)နာရီအချိန်တွင် တွေ့ရှိခဲ့ကြောင်း Yonhap သတင်းအေဂျင်စီက ဖော်ပြထားသည်။ တောင်ကိုရီးယားတွင် အမေရိကန်၏ လေယာဉ် တင်သင်္ဘောများ၊ ဗုံးကြဲလေယာဉ်များ နှင့်  ရေငုပ်သင်္ဘောများ ဖြန့်ကျက်ချထားမည်ဆိုပါက နျူကလီးယား လက်နက်များဖြင့် လက်တုံ့ပြန်မှုများ လုပ်ဆောင်သွားမည်ဖြစ်ကြောင်း မြောက်ကိုရီးယားဖက်က ဇူလိုင်လ(၂၁) ရက်တွင် သတိပေးပြောခဲ့သည်။

အကြိမ်ကြိမ်သတိပေးမှုများရှိနေသော်လည်း အမေရိကန်နှင့် တောင်ကိုရီးယားတို့သည် ဇူလိုင်လ(၁၈)ရက်တွင် မြောက်ကိုရီးယားအပေါ် နျူကလီးယားလက်နက်များအသုံးပြုရန်အတွက် နျူကလီးယားအတိုင်ပင်ခံအဖွဲ့အစည်း အဝေးကို ကျင်းပခဲ့ကြောင်း မြောက်ကိုရီးယားဖက်က စွပ်စွဲပြောခဲ့သည်။

တောင်ကိုရီးယားသို့ အမေရိကန်၏ ရေငုပ်သင်္ဘောရောက်ရှိလာပြီးနောက် မြောက်ကိုရီးယားသည် ဇူလိုင်လ(၁၉) ရက်တွင် ပဲ့ထိန်းဒုံးကျည်နှစ်စင်းကို ဂျပန်ပင်လယ်ထဲသို့ စမ်းသပ်ပစ်လွှတ်ခဲ့ပြီးနောက် ဇူလိုင်လ(၂၂)ရက်တွင် ခရုဇ် ဒုံးကျည်များ ထပ်မံစမ်းသပ်ပစ်လွှတ်ခဲ့ခြင်းဖြစ်သည်။အမေရိကန်သည် ကိုရီးယားကျွန်းဆွယ်တွင် နျူကလီးယား ကင်းစင်ရေးသဘောတူညီမှုများအတွက် ကြိုတင်သတ်မှတ်ချက်များမပါဘဲ စေ့စပ်ညှိနှိုင်းမှုများ လုပ်ဆောင်ရန် အဆင်သင့်ဖြစ်နေပြီဖြစ်ကြောင်း အမေရိကန်အမျိုးသားလုံခြုံရေးကောင်စီပြောရေးဆိုခွင့်ရှိသူ ဂျွန်ကာဘိုင်က ပြောကြားခဲ့သည်။

ထို့အပြင် တောင်ကိုရီးယားသို့ နျူကလီးယားစွမ်းအင်သုံး ပဲ့ထိန်းဒုံးကျည်တပ်ဆင်ထားသော ရေငုပ်သင်္ဘော စေလွှတ်ခြင်းသည် မဟာမိတ်နိုင်ငံကို ကာကွယ်ရန်အတွက်သာမဟုတ်ဘဲ တောင်ကိုရီးယားနိုင်ငံတွင်းရှိ အမေရိကန်စစ်သား(၃၈ဝဝဝ) နှင့် ၎င်းတို့၏မိသားစုများကို ကာကွယ်ရန်အတွက်လည်းဖြစ်ကြောင်း ဂျွန်ကာဘိုင် က ပြောခဲ့သည်။