သန့်ဇင် (NSS) - ဇူလိုင် ၂၀

ပဲခူးတိုင်း၊ သနပ္ပင်မြို့နယ်ရှိ ရိုးအတွင်း၌ စက်လှေတစ်စီးတိမ်းမှောက်မှုဖြစ်ပွားခဲ့ရာ (၄)နှစ်အရွယ် ကလေးငယ်တစ်ဦး အပါအဝင် အမျိုးသမီး(၄) သေဆုံးခဲ့ကြောင်း ဒေသခံတစ်ဦးထံမှ သိရသည်။

ဖြစ်စဉ်မှာ ယမန်နေ့ (ဇူလိုင်လ ၁၉ ရက်)၊ ညနေ ၃နာရီခွဲအချိန်ခန့်တွင် သနပ္ပင်မြို့နယ်၊ ကျွဲဖြူချောင်းကျေးရွာရှိ ရိုးအတွင်း၌ အထက်ပါကဲ့သို့ဖြစ်ပွားခဲ့ကြောင်း သိရသည်။

“စက်လှေမှောက်တယ်လို့ပဲကျွန်တော်တို့လဲသိရတာပါ ။ စုစုပေါင်း မိသားစု(၁၁)ယောက်တည်းပါတာ။ ဘုန်းကြီးကျောင်းကို ဝါဆိုသင်္ကန်းကပ်ပြီးပြန်လာတာ။ အပြန်မှာမှောက်တာပါဗျ” ဟု ဒေသခံတစ်ဦးက NP News ကိုပြောသည်။

အဆိုပါစက်လှေတိမ်းမှောက်မှုကြောင့် (၄)နှစ်အရွယ်ကလေးငယ်တစ်ဦးအပါအဝင် အမျိုးသမီး(၄)ဦး သေဆုံးခဲ့ကြောင်း သိရသည်။

“လာတဲ့လူတွေက ရန်ကုန်တိုင်း သာကေတကပါ။ သေတာကအမျိုးသမီး(၄)ယောက်ပေါ့။ (၄)နှစ်နဲ့ ၄ လ အရွယ်ကလေးပါတယ်။ နောက်ပြီး (၁၅)နှစ်၊ (၄၀)ရယ်၊ (၅၅)နှစ်အရွယ်ရယ်ပါ”ဟု ၎င်းကဆက် လက်ပြောသည်။

သေဆုံးသူများကို သနပ္ပင်မြို့နယ်ဆေးရုံရင်ခွဲရုံမှ တောင်ဒဂုံမြို့နယ် ကျီစုသုသာန်သို့ ကလျာဏမိတ္တလူမူကူညီရေးအသင်း၊ သာမဏေကျော် လူမူကူညီရေးအသင်း၊ သနပ္ပင်စေတနာရှင် လူမူကူညီရေးအသင်း ကားများဖြင့် ပို့ဆောင်ပေးခဲ့ကြောင်း သိရသည်။