ဂျန်ဇက် (NSS) - ဇူလိုင် ၂ဝ

က‌မ္ဘောဒီးယားအမှတ်ပေး ဘောလုံးပြိုင်ပွဲဝင်မှာ ပါဝင်ယှဉ်ပြိုင်နေတဲ့အသင်းတွေဟာ သြဂုတ်လ ၅ ရက်နေ့မှာ စတင်မယ့် ရာသီအသစ်မစတင်ခင်ကစားသမားအသစ်များခေါ်ယူလျက်ရှိနေရာ အမှတ်ပေးချန်ပီယံဖြစ်တဲ့ Phnom Penh Crown အသင်းဟာ မြန်မာနောက်ခံကစားသမား စိုးမိုးကျော်ကို ခေါ်ယူလိုက်ကြောင်း သိရပါတယ်။ 

စိုးမိုးကျော်ဟာ ကမ္ဘောဒီးယားဘောလုံးလိဂ်ကို ပြောင်းရွှေ့ကစားခဲ့တဲ့ ဒုတိယမြောက်ကစားသမားဖြစ်လာခဲ့ပါ တယ်။ မြန်မာကစားသမား သီဟဇော်ဟာ ဒီနှစ်အစောပိုင်းက ကမ္ဘောဒီးယားအခြေစိုက်လိဂ်တစ်သင်းဖြစ်တဲ့ Prey Veng FBC ကို ပြောင်းရွှေ့ကစားခဲ့ကြောင်း သိရပါတယ်။ 

စိုးမိုးကျော်က "Phnom Penh Crown အသင်းဟာ ကမ္ဘောဒီးယားအမှတ်ပေးဘောလုံးပြိုင်ပွဲမှာ အကောင်းဆုံး ကလပ်ဖြစ်ပါတယ်။ Phnom Penh Crown အသင်းကိုပြောင်းရွှေ့ကစားခွင့်ရလို့ ပျော်ရွှင်မိသလို ဂုဏ်လည်း ဂုဏ်ယူမိပါတယ်။ ကျွန်တော်ဟာ Phnom Penh Crown ကလပ်အသင်းကို ပထမဆုံးပြောင်းရွှေ့ကစားခွင့်ရတဲ့ ပထမဆုံး မြန်မာဘောလုံးသမားတစ်ဦးဖြစ်လာခဲ့ပါတယ်" လို့ ပြောပါတယ်။

အသက် ၂၄ နှစ်အရွယ်ရှိ စိုးမိုးကျော်ဟာ ပြီးခဲ့တဲ့ရာသီက ထိုင်းဘန်ကောက်မြို့အခြေစိုက် Kasetsart Football Club  အသင်းမှာ ပါဝင်ကစားခဲ့သူဖြစ်ပါတယ်။ စိုးမိုးကျော်ဟာ မြန်မာပြည်တွင်းအခြေစိုက်ကလပ်တွေဖြစ်တဲ့ ဧရာဝတီယူနိုက်တက်၊ ရန်ကုန်ယူနိုက်အသင်းတို့မှာ ပါဝင်ကစားခဲ့ဖူးပြီး ၂ဝ၂၂ ခုနှစ်မှာ ရန်ကုန်ယူနိုက်တက် အသင်းကနေ ထိုင်းကလပ်ကိုပြောင်းရွှေ့ကစားခဲ့တာဖြစ်ကြောင်း သိရပါတယ်။

Phnom Penh Crown အသင်းဟာ ပြီးခဲ့တဲ့ ၂ဝ၂၂ခုနှစ် ကမ္ဘောဒီးယားအမှတ်ပေးဘောလုံးပြိုင်ပွဲမှာ ချန်ပီယံဆုကို ရယူနိုင်တဲ့ အသင်းဖြစ်ပါတယ်။ လက်ရှိအချိန်မှာ ကမ္ဘောဒီးယားအမှတ်ပေးလိဂ်ကို အာဆီယံအဖွဲ့ဝင်နိုင်ငံများရဲ့ ကစားသမားတွေ ပြောင်းရွှေ့ကစားမှု ပိုမိုများပြားလာနေကြောင်း သိရပါတယ်။ 

လက်ရှိအပြောင်းအရွှေ့ကာလအတွင်းမှာ ကမ္ဘောဒီးယားအခြေစိုက်လိဂ်တွေကို လာအိုတိုက်စစ်မှူး Bounphachan Bounkong၊ အင်ဒိုနီးရှားတိုက်စစ်မှူး Rafli Mursalim အပါအဝင် အာဆီယံနိုင်ငံတွေရဲ့ လက်ရွေးစင်ကစားသမား တွေ ပြောင်းရွှေ့ကစားလျက်ရှိနေကြောင်း သိရပါတယ်။