NSS -  ဇူလိုင် ၁၉

ရေကြီးရေလျှံမှုများ ဖြစ်ပွားနေသည့် မော်လမြိုင်မြို့၌ တစ်ရက်အတွင်း ကလေးငယ်(၃)ဦး ရေနစ်သေဆုံးမှုဖြစ်ပွားခဲ့ကြောင်း ကျန်းမာချမ်းသာလူမှုကူညီရေးအဖွဲ့ထံမှ သတင်းရရှိသည်။

အဆိုပါဖြစ်စဥ်များသည် ယနေ့(ဇူလိုင်လ ၁၉ ရက်)တွင် မော်လမြိုင်မြို့နယ်ရှိ သီရိမြိုင်(၈)လမ်းနှင့် သီရိမင်္ဂလာ(၁၇)လမ်းတို့တွင် ဖြစ်ပွားခဲ့ကြောင်း ကျန်းမာချမ်းသာ လူမှုကူညီရေးအသင်းထံမှ သိရသည်။

သီရိမင်္ဂလာ(၁၇)လမ်းတွင် အဘိုးဖြစ်သူနှင့်အတူနေထိုင်သည့် အသက်တစ်နှစ်ခွဲအရွယ် ကလေးငယ်တစ်ဦးသည် ယနေ့နံနက်ပိုင်းတွင် ရေနစ်သေဆုံးခဲ့ကြောင်း သိရသည်။‌

“မနက်ကနစ်တဲ့ကလေးက အဘိုးနဲ့နေတာပါ။ ရေကလည်းတက်နေတော့ ကလေးပြုတ်ကြတာအဘိုးကမသိတာဖြစ်မယ်။ သီရိမင်္ဂလာ (၁၇)လမ်းမှာနေတာပါ။ ကလေးရဲ့အလောင်းကို မနက်ထဲကပြန်တွေ့ပါတယ်” ဟု ကျန်းမာချမ်းသာလူမှုကူညီရေးအသင်းမှ တာဝန်ရှိသူတစ်ဦးက NP News ကိုပြောသည်။

ထို့ပြင် ညနေပိုင်း၌ သီရိမြိုင်(၈)လမ်းရှိ က‌လေးငယ်နှစ်ဦးသည် ရေကစားနေစဥ် ထပ်မံရေနစ်သေဆုံးခဲ့ကြောင်း အဆိုပါ လူမှုကူညီရေးအသင်းက ဆက်လက်အသိပေးပြောကြားခဲ့သည်။

“ရေကလည်းကြီးနေတော့‌ရေကစားကြတာနေမှာပေါ့ ။ ရေကစားရင်းနစ်သွားတာထင်ပါတယ်။ အသက် (၁၃)နှစ်အရွယ်ကလေးငယ်နှစ်ဦး သူတို့က သီရိမြိုင်ရပ်ကွက် (၈)လမ်းမှာပဲနေကြတာပါ။ လိုက်ဆယ်တယ်ဆယ်တော့ဆုံးနေပြီ။ သူတို့ရေကူးတဲ့နေရာမှာပဲပြန်တွေ့ပါတယ်။ အဲဒီနေရာကလည်းနည်းနည်းနက်တယ်လေ။ ကူးတာကသုံးယောက်လို့ပြောတယ်။ နှစ်ယောက်ကနစ်တော့ တစ်ယောက်ကအိမ်ကို ပြန်ပြေးပြောတယ်”ဟု ၎င်းက ဆက်လက်ပြောသည်။

ရေနစ်သေဆုံးခဲ့သည့် ကလေးငယ်များ၏အလောင်းများကို မော်လမြိုင်ဆေးရုံကြီးသို့ ပို့ဆောင်ပေးခဲ့ကြောင်း သိရသည်။

မော်လမြိုင်မြို့နယ်အတွင်း ယမန်နေ့(ဇူလိုင်လ ၁၈ ရက်) ညနေပိုင်းမှစတင်ကာ ရေကြီး‌ရေလျှံမှုများ စတင်ဖြစ်ပွားခဲ့ပြီး လက်ရှိအချိန်အထိ ရေများပြန်လည်ကျဆင်းခြင်းမရှိသေးကြောင်း သိရသည်။

အဆိုပါ ရေကြီးရေလျှံမှုများနှင့်ပတ်သက်၍ သက်ဆိုင်ရာတာဝန်ရှိသူများက လိုက်လံကြည့်ရှုမှုများပြုလုပ်နေသည်ဟုလည်း ဒေသခံများ က ပြောသည်။

ယနေ့(ဇူလိုင် ၁၉ ရက်နေ့)တွင် ရွာသွန်းခဲ့သော မိုးရေချိန်မှာ မော်လမြိုင်မြို့နယ်အတွင်း နှစ်ပေါင်း(၇၁)နှစ်အတွင်း၌  မိုးရေချိန်စံချိန် သစ်တင်ကာ ရွာသွန်းခဲ့ခြင်းဖြစ်ကြောင်း မိုးဇလမှ ထုတ်ပြန်ထားသည်။

အဆိုပါ မိုးရွာသွန်းမှုကြောင့် လက်ရှိတွင် မော်လမြိုင်မြို့ပေါ်ရှိ ရပ်ကွက်ကြီး(၈)ခုတွင် ရေကြီးရေလျှံမှုများ ဖြစ်‌ပေါ်နေပြီး ပြောင်းရွှေ့နေရ သည့် အိမ်ထောင်စုများလည်း ရှိနေကြောင်း ဒေသခံလူမှုကူညီရေးအသင်းထံမှ သိရသည်။

ရေကြီးရေလျှံမှုများကြောင့်  အထက်ပါ ရပ်ကွက်ကြီး(၈)ခုမှ လူဦးရေပေါင်း (၅၀၀)နီးပါးကို နီးစပ်ရာ ဘုန်းကြီးကျောင်းများနှင့် ဓမ္မာရုံ များသို့ ရွှေ့ပြောင်းထားကြောင်း သိရသည်။