Htay Oung (NSS) - ဇူလိုင် ၁၇ 

အမေရိကန်ဒေါ်လာအစား ရူပီးငွေကြေးကို အသုံးပြုပြီး ကုန်သွယ်ရေးမှာ အခြေချခွင့် ရရှိဖို့အတွက် အိန္ဒိယက ယူအေအီး (ခေါ်) အာရပ်စော်ဘွားများပြည်ထောင်စု နဲ့ သဘောတူညီချက်တစ်ရပ်ကို လက်မှတ်ရေးထိုးလိုက်ပါ တယ်။ ဒေါ်လာငွေကို အခြေခံပြီး လဲလှယ်နေကြရာမှာ ကုန်ကျစရိတ်များကိုလျှော့ချဖို့အတွက် ကြိုးပမ်းမှုများမှာ နယူးဒေလီက အရှိန်မြှင့်တင်လာခြင်းဖြစ်တယ်လို့ Reuters က ယမန်နေ့ ရေးသားပါတယ်။

စနေနေ့ ဇူလိုင်လ ၁၅ ရက်က ယူအေအီးနိုင်ငံကို အိန္ဒိယဝန်ကြီးချုပ် နာရင်ဒြာမိုဒီ လာရောက်လည်ပတ်စဉ်အတွင်း နှစ်နိုင်ငံနယ်စပ်ဖြတ်ကျော် ငွေလွှဲမှုများ လွယ်ကူချောမွေ့စေဖို့ နဲ့ အချိန်နဲ့တပြေးညီ ငွေပေးချေမှုများအတွက် ချိတ်ဆက်မှုတစ်ခု ထူထောင်ဖို့ကိုလည်း သဘောတူညီခဲ့ကြပါတယ်။

အဲဒီသဘောတူညီချက်နှစ်ခုဟာ ချောမွေ့တဲ့ နယ်စပ်ဖြတ်ကျော်ငွေပေးငွေယူမှုများနဲ့ ငွေပေးချေမှုများကို လုပ်ဆောင်နိုင်ပြီး ပိုမိုကြီးမားတဲ့ စီးပွားရေးပူးပေါင်းဆောင်ရွက်မှုကို မြှင့်တင်ပေးနိုင်မှာဖြစ်ကြောင်း  စနေနေ့ ဇူလိုင် ၁၅ ရက်က အိန္ဒိယဗဟိုဘဏ်ရဲ့သတင်းထုတ်ပြန်ချက်မှာ ဖော်ပြထားပါတယ်။

ရူပီးငွေကြေးကို အခြေခံပြီး ကမ္ဘာလုံးဆိုင်ရာကုန်သွယ်မှုကိုဖြေရှင်းမယ့် မူဘောင်တစ်ရပ်ကို ကမ္ဘာ့တတိယ အကြီးဆုံး ရေနံတင်သွင်းသူနဲ့ စားသုံးသူစျေးကွက်ကြီးဖြစ်တဲ့ အိန္ဒိယနိုင်ငံရဲ့ဗဟိုဘဏ်က ယမန်နှစ်မှာ ကြေညာခဲ့ပါတယ်။ လောလောဆယ် အိန္ဒိယဟာ ယူအေအီးနိုင်ငံက ရေနံကို အမေရိကန်ဒေါ်လာနဲ့ ပေးချေနေရပါ တယ်။ 

နှစ်နိုင်ငံအကြား ကုန်သွယ်မှုပမာဏဟာ ၂ဝ၂၂ ခုနှစ် ဧပြီလမှ ၂ဝ၂၃ ခုနှစ် မတ်လအထိ တစ်နှစ်တာ ကာလအတွင်း ကန်ဒေါ်လာ ၈၄ ဒသမ ၅ ဘီလျံအထိ ရှိခဲ့ပါတယ်။

ယူအေအီးရေနံအတွက် အိန္ဒိယက ပထမဆုံး ရူးပီးငွေအသုံးပြုမှုအဖြစ် အဘူဒါဘီအမျိုးသားရေနံကုမ္ပဏီကို ငွေပေး သွင်းနိုင်ခဲ့တယ်လို့  သဘောတူညီချက်အသေးစိတ်အချက်အလက်များကို သိရှိထားတဲ့ တာဝန်ရှိသူတစ်ဦးက ရိုက်တာသတင်းအေဂျင်စီကို  ပြောပြပါတယ်။

နှစ်နိုင်ငံ ဗဟိုဘဏ်အချင်းချင်း ချိတ်ဆက်ဖို့ကိုလည်း နယူးဒေလီနိုင်ငံတော်ဗဟိုဘဏ်ထံမှ သိရှိရပါတယ်။ အာရှမှာ တစ်နေ့တစ်ခြား ပိုမိုအသုံးများလာတဲ့ အခုလိုအစီအစဉ်တွေဟာ ပုံမှန်အားဖြင့် ငွေပေးချေမှုကုန်ကျစရိတ်များကို လျှော့ချပေးပါတယ်။

စနေနေ့နံနက် စောစောပိုင်း တစ်ရက်ကြာ ခရီးစဉ်အဖြစ် အဘူဒါဘီကို ရောက်ရှိလာတဲ့ အိန္ဒိယဝန်ကြီးချုပ်ဟာ ယူအေ အီးနိုင်ငံ သမ္မတ မိုဟာမက်_ဘင်_ဇေယက်_အယ်လ်_နာဟန်နဲ့ တွေ့ဆုံခဲ့ပါတယ်။

#ဒေါ်လာအစား_ရူပီးငွေကြေးအသုံးပြု_ကုန်သွယ်ရေး #၀န်ကြီးချုပ်နာရင်ဒြာမိုဒီ #အိန္ဒိယ #ယူအေအီး 

#ကမ္ဘာ့တတိယအကြီးဆုံး_ရေနံတင်သွင်းသူနှင့်_စားသုံးသူစျေးကွက်ကြီး #နယ်စပ်ဖြတ်ကျော်_ငွေပေးငွေယူ_ငွေပေးချေမှုများ

(Reuters., 16 July 2023,” India ties up with UAE to settle trade in rupees ” ကို #HtayOung, #OungMarine ဆီလျော်အောင် ကောက်နှုတ်ဘာသာပြန်ဆိုသည်။)