ဂျန်ဇက် (NSS) - ဇူလိုင် ၁၃ 

 မြန်မာနိုင်ငံဆိုင်ရာအာဆီယံဥက္ကဋ္ဌရဲ့အထူးကိုယ်စားလှယ်ဖြစ်တဲ့ အင်ဒိုနီးရှားနိုင်ငံခြားရေးဝန်ကြီး ရက်နိုမာဆူဒီ ကို ဒေါ်အောင်ဆန်းစုကြည် အပါအဝင် မြန်မာနိုင်ငံရေးမှာ ပါဝင်နေသူအားလုံးနဲ့ တွေ့ဆုံဆွေးနွေးခွင့် ပေးစေလို တယ်လို့ စင်ကာပူနိုင်ငံခြားရေးဝန်ကြီးက တိုက်တွန်းတောင်းဆိုလိုက်ကြောင်း သိရပါတယ်။

စင်ကာပူနိုင်ငံခြားရေးဝန်ကြီး ဗီဗီယမ်ဘလာကရစ်နန်ဟာ အင်ဒိုနီးရှားနိုင်ငံမှာ ကျင်းပနေတဲ့ အာဆီယံ နိုင်ငံခြားရေးဝန်ကြီးများအစည်းအဝေးကို တက်ရောက်ပြီးနောက် မြန်မာနိုင်ငံရေးနဲ့ပတ်သက်ပြီး အခုလိုမျိုး သတင်းထုတ်ပြန်လိုက်တာဖြစ်ပါတယ်။ 

အာဆီယံနိုင်ငံခြားရေးဝန်ကြီးတွေဟာ  မြန်မာနိုင်ငံရေးအခြေအနေကိုဖြေရှင်းနိုင်ဖို့ ချဉ်းကပ်ရာမှာ အာဆီယံ သဘောတူညီချက်ငါးချက်ကို ဆက်လက်အသုံးပြုသွားမှာဖြစ်တယ်လို့ စင်ကာပူနိုင်ငံခြားရေးဝန်ကြီး က ပြောပါတယ်။

စင်ကာပူနိုင်ငံခြားရေးဝန်ကြီး ဗီဗီယမ်ဘလာကရစ်နန်က "အာဆီယံသဘောတူညီချက်ငါးချက်ကို အကောင် အထည်ဖော်ရာမှာ အာဆီယံခေါင်းဆောင်မျာရဲ့ဆုံးဖြတ်ချက် နဲ့ ပြန်လည်သုံးသပ်ခြင်းကို လက်ခံသွားရမှာလည်း ဖြစ်တယ်။ စင်ကာပူအစိုးရဟာ အာဆီယံသဘောတူညီချက်ငါးချက်မှာ ပါဝင်တဲ့ မြန်မာနိုင်ငံရေး အခက်အခဲကို ဖြေရှင်းဖို့ အားလုံးပါဝင်တဲ့ အမျိုးသားပြန်လည်တွေ့ဆုံရေးဖြစ်မြောက်စေဖို့၊ လူသားချင်းဆိုင်ရာစာနာမှုအကူအညီ တွေပေးဖို့နဲ့ အကြမ်းဖက်မှုများ ရပ်တန့်ဖို့  အင်ဒိုနီးရှားနိုင်ငံရဲ့ဆောင်ရွက်ချက်တွေကို အားပေးထောက်ခံမှု ဆက်လုပ်သွားမယ်" လို့ ပြောပါတယ်။ 

ထိုင်းနိုင်ငံက မြန်မာအရေးအလွတ်သဘောတွေ့ဆုံဆွေးနွေးမှုကို အိမ်ရှင်အဖြစ်လက်ခံကျင်းပပြီး မြန်မာနိုင်ငံခြားရေးဝန်ကြီးကို ဖိတ်ခေါ်မှုနဲ့ပတ်သက်ပြီး အာဆီယံအဖွဲ့ဝင်နိုင်ငံများကြား သဘောထားကွဲလွဲမှုများ ဖြစ်ပွားလာခဲ့ကြောင်း သတင်းများထွက်ပေါ်ခဲ့ပါတယ်။ 

အင်ဒိုနိးရှားနိုင်ငံခြားရေးဝန်ကြီး ရက်နိုမာဆူဒီက နိုင်ငံရေးနည်းလမ်းနဲ့အဖြေရှာဖို့ နဲ့ ရေရှည်တည်တံတဲ့ ငြိမ်းချမ်းရေးရယူဖို့ မြန်မာနိုင်ငံရေးမှာ ပါဝင်နေတဲ့အဖွဲ့အစည်းအားလုံးကြား တွေ့ဆုံဆွေးနွေးမှု လုပ်ဆောင်သွားရမှာဖြစ်ကြောင်း ဆိုပါတယ်။ 

ဒါပေမယ့် အာဆီယံသံတမန်အသိုင်းအဝိုင်းမှာတော့ မြန်မာအရေးအတွက် အင်ဒိုနီးရှားနိုင်ငံရဲ့ကြိုးပမ်းမှုတွေအပေါ် အားရကျေနပ်မှုမရှိကြောင်း၊ အာဆီယံအထူးကိုယ်စားလှယ်အနေနဲ့ မြန်မာနိုင်ငံရေးမှာ ပါဝင်နေတဲ့အဖွဲ့များကြား ကွာဟချက်ကို ပေါင်းကူးတံတားအဖြစ် လုပ်ဆောင်ပေးဖို့ လိုအပ်ချက်များရှိနေကြောင်း သိရပါတယ်။