ဂျန်ဇက် (NSS) - ဇူလိုင် ၁၂

အင်ဒိုနီးရှားရေကြောင်း အာဏာပိုင်တွေဟာ အီရန်အလံလွှင့်ထူထားတဲ့ရေနံတင်သင်္ဘောကို ဖမ်းဆီးလိုက်ကြောင်း သတင်းထုတ်ပြန်လိုက်ပါတယ်။ 

ရေနံစိမ်း တန်ချိန် ၂ဝဝဝဝဝ ကျော်တင်ဆောင်လာတဲ့ အီရန်ရေနံတင်သင်္ဘောဟာ ပင်လယ်ထဲမှာ တရားမဝင် လွှဲပြောင်းမှုများပြုလုပ်နေတယ်လို့ သံသယရှိမှုနဲ့ပတ်သက်ပြီး ဖမ်းဆီးခဲ့ခြင်းဖြစ်တယ်လို့ အင်ဒိုနီးရှားရေကြောင်း  အာဏာပိုင်တွေက ပြောပါတယ်။ 

အင်ဒိုနီးရှားရေကြောင်းအာဏာပိုင်အဖွဲ့က "အင်ဒိုနီးရှား အထူးစီးပွားရေးဇုန်အတွင်း အီရန်ရေနံတင်သင်္ဘောဟာ တရားမဝင် ရေနံလွှဲပြောင်းမှုတွေ လုပ်ဆောင်ခဲ့တယ်။ အဲဒီအတွက် ဖမ်းဆီးလိုက်တာဖြစ်တယ်။ ရေနံလွှဲပြောင်းမှု တွေမှာ ပါဝင်တဲ့ သင်္ဘောနှစ်စီးကို ဖမ်းဆီးခဲ့တာပါ" လို့ သတင်းထုတ်ပြန်ထားပါတယ်။

အီရန်ရေနံတင်သင်္ဘောထဲမှာ ဆီးရီးယားနိုင်ငံသားသင်္ဘောသား ၂၈ ဦး နဲ့ ခရီးသည် ၃ ဦး ပါဝင်ခဲ့ကြောင်း၊ အမေရိကန်ဒေါ်လာ ၁ဝ သန်းတန်ဖိုးရှိ ရေနံများတင်ဆောင်လာခဲ့ခြင်းဖြစ်ကြောင်း အင်ဒိုနီးရှားရေကြောင်း အာဏာပိုင်တွေက ပြောပါတယ်။ အင်ဒိုနီးရှားအစိုးရဟာ အဆိုပါ တရားမဝင် ရေနံလွှဲပြောင်းလုပ်ဆောင်မှုမှာ အီရန် အစိုးရ တိုက်ရိုက်ပါဝင်ဆက်နွယ်နေခြင်း ရှိ/မရှိ ဆိုတဲ့အချက်ကို အတိအကျ ပြောဆိုခဲ့ခြင်းမရှိကြောင်း သိရပါတယ်။

အင်ဒိုနီးရှားရေကြောင်းအာဏာပိုင်အဖွဲ့က ၎င်းတို့ဟာ အင်ဒိုနီးရှားအထူးစီးပွားရေးဇုန်အတွင်း တရားမဝင် ရေနံ လွှဲပြောင်းမှုတွေ လုပ်ဆောင်နေတဲ့ အီရန်ရေနံတင်သင်္ဘောကို ဆက်သွယ်ခဲ့ပေမယ့် တုံ့ပြန်ခြင်းမရှိဘဲ ထွက်ပြေးဖို့ ကြိုးပမ်းခဲ့ခြင်းကြောင့် လိုက်လံဖမ်းဆီးရခြင်းများ ရှိခဲ့ကြောင်း ပြောပါတယ်။

အဆိုပါရေနံတင်သင်္ဘော ဖမ်းဆီးခံရခြင်းနဲ့ပတ်သက်ပြီး သင်္ဘောပိုင်ရှင်က တစ်စုံတစ်ရာ တုံ့ပြန်ပြောဆိုခြင်း မရှိသေးကြောင်း ဆိုပါတယ်။