ဂျန်ဇက် (NSS) - ဇူလိုင် ၁ဝ

ရုရှားသမ္မတပူတင်ကို နိုင်ငံတကာရာဇဝတ်တရားရုံး (ICC) က ဖမ်းဝရမ်းထုတ်ထားပေမယ့် လာမယ့်လမှာ ကျင်းပမယ့်  BRICS ထိပ်သီးအစည်းအဝေးမှာ ခေါင်းဆောင်များကြား လူချင်းတွေ့ဆုံဆွေးနွေးသွားမှာဖြစ်ကြောင်း တောင်အာဖရိကသမ္မတက ထုတ်ဖော်ပြောဆိုလိုက်ပါတယ်။

တောင်အာဖရိကသမ္မတ ခရိုင်ရာမာဖိုဆာက ၎င်းအနေနဲ့ ထိပ်သီးအစည်းအဝေးကိုတက်ရောက်ဖို့ ရုရှားသမ္မတ ပူတင်ကို ဖိတ်ကြားထားကြောင်း ပြောပါတယ်။ တောင်အာဖရိကနိုင်ငံဟာ လက်ရှိအချိန်မှာ BRICS အဖွဲ့ရဲ့ အလှည့်ကျဥက္ကဋ္ဌအဖြစ် တာဝန်ယူနေပြီး ထိပ်သီးအစည်းအဝေးကို အိမ်ရှင်အဖြစ် လက်ခံကျင်းပသွားရမှာ ဖြစ်ပါတယ်။ 

တောင်အာဖရိကသမ္မတက "ထိပ်သီးအစည်းအဝေးကို စီစဉ်ထားတဲ့အတိုင်း ကျင်းပသွားမှာပါ။ ထိပ်သီးအစည်း အဝေးကျင်းပမယ့်အစီအစဉ်တွေကို အပြီးသတ်ဆွေးနွေးထားတယ်။ ထိပ်သီးအစည်းဝေးမှာ ခေါင်းဆောင်တွေ လူချင်းတွေ့ဆုံ ဆွေးနွေးမှာပါ" လို့ ပြောပါတယ်။ 

ထိပ်သီးအစည်းအဝေးကို တက်ရောက်ဖို့ ရုရှားသမ္မတပူတင်ကို ဖိတ်ကြားထားပေမယ့် တက်ရောက်ခြင်း ရှိ/မရှိ ဆိုတဲ့အချက်ကို အတိအကျမသိသေးကြောင်း တောင်အာဖရိက သမ္မတက ပြောပါတယ်။ ယူကရိန်းကလေးတွေကို ရုရှားနိုင်ငံထံ ပို့ဆောင်မှုနဲ့ပတ်သက်ပြီး နိုင်ငံတကာရာဇဝတ်တရားရုံးဟာ ရုရှားသမ္မတပူတင်ကို ဖမ်းဝရမ်း ထုတ်ထားကြောင်း သိရပါတယ်။ 

BRICS အဖွဲ့ကို ရုရှားနဲ့ တရုတ်နိုင်ငံတို့က ဦးဆောင်ဖွဲ့စည်းထားပြီး အိန္ဒိယ၊ ဘရာဇီး နဲ့ တောင်အာဖရိကနိုင်ငံတို့ ပါဝင်လျက်ရှိနေရာ အမေရိကန် နဲ့ ဥရောပသမဂ္ဂအဖွဲ့တို့ကို စိန်ခေါ်မယ့်အဖွဲ့အဖြစ် သတ်မှတ်ခံထားရပါတယ်။ 

တောင်အာဖရိကနိုင်ငံဟာ နိုင်ငံတကာရာဇဝတ်တရားရုံးအဖွဲ့ဝင်နိုင်ငံဖြစ်တဲ့အတွက် ရုရှားသမ္မတပူတင် တောင်အာဖရိကနိုင်ငံကို ရောက်ရှိလာမယ်ဆိုရင် ဖမ်းဆီးရဖွယ်ရှိနေပါတယ်။ တောင်အာဖရိကသမ္မတက "လာမယ့် ထိပ်သီးအစည်းအဝေးကို အွန်လိုင်းက လုပ်မှာမဟုတ်ဘူး။ ခေါင်းဆောင်တွေအားလုံး မျက်နှာချင်းဆိုင် တွေ့ဆုံဆွေးနွေးကြမှာပါ။ ခေါင်းဆောင်တွေအချင်းချင်း မျက်နှာချင်းဆိုင်တွေ့ဆုံဆွေးနွေးမှု မရှိတာ သုံးနှစ်ကြာနေပြီ။ ဒါကြောင့် လာမယ့်ထိပ်သီးအစည်းအဝေးကို ခေါင်းဆောင်တွေကြား မျက်နှာချင်းဆိုင်တွေ့ဆုံဆွေးနွေးဖို့ စီစဉ်ထားတာပါ" လို့ ပြောပါတယ်။