NSS - ဇူလိုင် ၇

(၁၃)ကြိမ်မြောက် သက်ကြီးလူရွှင်တော်များ ပူဇော်ကန်တော့ပွဲကို  ဇူလိုင်လ(၇)ရက်တွင် နေပြည်‌တော်ရှိ MICC-2 ၌ ကျင်းပခဲ့သည်။

အဆိုပါ သက်ကြီးလူရွှင်တော်များ ပူဇော်ကန်တော့ပွဲသို့ ဝါရင့်လူရွှင်တော်ကြီးများဖြစ်သည့် ဦးမိုးဒီ၊ ဦးပေါ်လေး၊ ဦးချစ်စရာ၊ ဦးဥဩ အပါအဝင် ကန်တော့ခံသက်ကြီးလူရွှင်တော် (၁ဝ၇)ဦး တက်ရောက်ကန်တော့ခံခဲ့ပြီး သရုပ်ဆောင်များဖြစ်သည့် အကယ်ဒမီရန်အောင်၊အကယ်ဒမီ စိုးသူ ၊ အကယ်ဒမီ စိုးမြတ်သူဇာ နှင့် အကယ်ဒမီ စိုးမြတ်နန္ဒာတို့ တက်ရောက်ခဲ့ကြောင်း သိရသည်။

ပထမဦးစွာ ပြန်ကြား‌ရေးဝန်ကြီးဌာန ပြည်ထောင်စုဝန်ကြီး ဦးမောင်မောင်အုန်းက မြန်မာ နိုင်ငံ ဟာသပညာရှင်များအစည်းအရုံး(ဗဟို)အား ခွင့်ပြုခြင်းနှင့် လူရွှင်တော်များအတွက် အမှာစကားပြောကြားခဲ့သည်။ 

ယင်းနောက် ဟာသလူရွှင်တော်များမှ တစ်ခန်းရပ်ဟာသများ ၊ သက်ကြီးလူရွှင်တော်ကြီးများ၏ သနားစရာတစ်ခန်းရပ်ပြဇာတ်များဖြင့် ကပြဖျော်ဖြေခဲ့ကြသည်။

မြန်မာနိုင်ငံဟာသပညာရှင်များအစည်းအရုံး(ဗဟို)ဥက္ကဋ္ဌဖြစ်သူ  ဦးဒိန်းဒေါင်ကလည်း သက်ကြီးလူရွှင်တော်များနှင့်တကွ တက်ရောက်လာကြသူများအားကျေးဇူးတင်ကြောင်းနှင့် ရှေ့ဆက်မည့် လုပ်ငန်းများအားရှင်းလင်းတင်ပြခဲ့သည်။ 

ဆက်လက်ပြီး မြန်မာနိုင်ငံဟာသပညာရှင်များအစည်းအရုံး(ဗဟို)ဥက္ကဋ္ဌ ဦးဒိန်းဒေါင်မှ  ဦးဆောင်ပြီး သက်ကြီးလူရွှင်တော်ကြီးများအားကန်တော့ခဲ့ကြကာ အမှတ်တရပစ္စည်းများပေးအပ်ခဲ့ကြသည်။ 

(၁၃)ကြိမ်မြောက် သက်ကြီးလူရွှင်တော်များ ပူဇော်ကန်တော့ပွဲသို့  ပြန်ကြား‌ရေးဝန်ကြီးဌာန ပြည်ထောင်စုဝန်ကြီး ဦးမောင်မောင်အုန်း ၊ နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းနှင့် ပြန်ကြား‌ရေးဝန်ကြီးဌာနဒုတိယဝန်ကြီး ဦးရဲတင့်တို့ တက်ရောက်ခဲ့ကြောင်းသိရသည်။