စော (NSS) - ဇူလိုင် ၅

မွန်ပြည်နယ်၊ ပေါင်မြို့နယ်တွင် ရော်ဘာထင်းများသယ်ဆောင်လာသည့် ကုန်တင်ကားတစ်စီး ဘရိတ်ပေါက်ပြီး ရထားသံလမ်းကူးတံခါးအား ဝင်တိုက်ခဲ့ကြောင်း သိရသည်။

ဖြစ်စဉ်မှာ ယနေ့(ဇူလိုင်လ ၅ ရက်)၊ မွန်းလွဲ (၁၂)နာရီဝန်းကျင်အချိန်တွင် ပေါင်မြို့နယ်၊ ရင်းငြိမ်တောင်ကျေးရွာ၊ ရထားသံလမ်းအနီး၌ အထက်ပါကဲ့သို့ဖြစ်ပွားခဲ့ခြင်းဖြစ်ကြောင်း မွန်မြတ်ကာရုညလူမှုကူညီရေးအသင်းထံမှ သိရသည်။

အဆိုပါ ရော်ဘာထင်းများသယ်ဆောင်လာသည့် ကုန်တင်ကားသည် မော်လမြိုင်ဘက်မှ သထုံဘက်သို့ သွားနေစဉ်‌ ရှေ့ဘီးဘရိတ်ပေါက်ပြီး‌နောက် ရထားသံလမ်းကူးတံခါးကို ဝင်တိုက်ပြီး နေအိမ်နှစ်လုံးကြားထဲသို့ ဝင်ရောက်ခဲ့ခြင်းဖြစ်ကြောင်း သိရသည်။

“သူက အရှိန်များပြီးတော့ ရှေ့ဘီးဘရိတ်ပေါက်တဲ့ကားပါ။ အဲဒီနားက အိမ်နှစ်လုံးကြားထဲကိုဝင်သွားတာပါ။ ဘေးမှာတော့ Transformerရှိတာပေါ့။ ယာဉ်မောင်းကတော့ ခြေထောက်ညပ်သွားလို့ ကျိုးသွားပါတယ်"ဟု မွန်မြတ်ကာရုည လူမှုကူညီရေးအသင်းမှ တာ၀န်ရှိသူတစ်ဦးက NP Newsကိုပြောသည်။

ထို့ကြောင့် ယာဉ်ပေါ်တွင်လိုက်ပါလာသည့် အမျိုးသားနှစ်ဦးအနက် ယာဉ်မောင်းဖြစ်သူမှာ ထိခိုက်ဒဏ်ရာရရှိခဲ့ကြောင်း သိရသည်။

အဆိုပါယာဉ်မောင်းအား မွန်ပြည်နယ်ရှိ ရင်းငြိမ်တိုက်နယ်ဆေးရုံသို့ပို့ဆောင်ထားကြောင်း သိရသည်။