စော (NSS) - ဇူလိုင် ၅

မန္တလေးတိုင်း၊ မန္တလေးမြို့တွင် အသက်(၂၇)နှစ်အရွယ် အမျိုးသားတစ်ဦး မူးယစ်ဆေးထိုးသွင်းစဉ် သေဆုံးခဲ့ကြောင်း သိရသည်။

ဖြစ်စဉ်မှာ ပြီးခဲ့သည့်(ဇူလိုင်လ ၃ ရက်)၊ ည (၈)နာရီဝန်းကျင်အချိန်တွင် မန္တလေးမြို့၊ (36) x (37) / 85D လမ်း၌ အထက်ပါကဲ့သို့ဖြစ်ပွားခဲ့ကြောင်း မဏီစလလူမှုကူညီရေးအသင်း(မန္တလေးမြို့)ထံမှ သိရသည်။

အဆိုပါအမျိုးသားသည် မူးယစ်ဆေးထိုးသွင်းအသုံးပြုချိန်တွင် သေဆုံးခဲ့ခြင်းကြောင့် အနီးရှိပြည်သူများမှ ဖုန်းဆက်အကူအညီတောင်းခံလာသည့်အတွက် သွားရောက်ကူညီခဲ့ခြင်းဖြစ်ကြောင်း မဏီစလလူမှုကူညီရေးအသင်းက ထုတ်ပြန်ထားသည်။

“ အုတ်ရေတွင်းကို မှီပြီးတော့ ဆေးထိုးအပ်ကဘေးမှာကျနေပြီ။ အဲဒီပုံစံနဲ့သူ့ကို တွေ့တာပါ။ သူ့ဘေးမှာတော့ ဆေးထိုးအပ်တစ်ချောင်းနဲ့ သူ့အင်္ကျီတစ်ထည်တွေ့ပါတယ်။ သူကတစ်ယောက်ထဲနေတာ ကြာပါပြီ”ဟု မဏီစလလူမှုကူညီရေးအသင်းမှ တာဝန်ရှိသူတစ်ဦးက NP News ကိုပြောသည်။

သေဆုံးသူအမျိုးသားသည် ကိုထွန်းထွန်းဝင်း (၂၇)နှစ်ဖြစ်ပြီး အဆိုပါလမ်းရှိ ဓမ္မာရုံဘေးတွင် နေထိုင်သူတစ်ဦးဖြစ်ကြောင်း ၎င်းကဆက်လက်ပြောဆိုထားသည်။

၎င်း၏ရုပ်အလောင်းအား မန္တလေးပြည်သူ့ဆေးရုံကြီး ရင်ခွဲရုံသို့ ပို့ဆောင်ခဲ့ကြောင်း သိရသည်။