NSS - ဇူလိုင် ၂

ကယားပြည်နယ်၊ လွိုင်ကော်မြို့နယ်ရှိ မြို့နယ်ပြည်သူ့ဆေးရုံအား Drone ယာဉ်ဖြင့် ဗုံးတစ်လုံးပစ်ချတိုက်ခိုက်မှုကြောင့် ပြည်သူတစ်ဦးနှင့် ပစ္စည်းအချို့ ထိခိုက်ပျက်စီးခဲ့ရကြောင်း မြန်မာနိုင်ငံရဲတပ်ဖွဲ့မှ သတင်းထုတ်ပြန်ထားသည်။

ပြီးခဲ့သော ဇွန်လ ၂၉ ရက်၊ နံနက် ၈နာရီ ၁၅မိနစ်အချိန်တွင် လွိုင်ကော်မြို့နယ်၊ မင်းစုရပ်ကွက်၊ ဝဏ္ဏလမ်းရှိ မြို့နယ်ပြည်သူ့ဆေးရုံ၌ အထက်ပါကဲ့သို့ဖြစ်ပွားခဲ့ကြောင်း သိရသည်။

ဖြစ်စဉ်မှာ အကြမ်းဖက်သမားများက အဆိုပါဆေးရုံအား Drone ယာဉ်အသုံးပြု၍ ဗုံးတစ်လုံးပစ်ချ တိုက် ခိုက်ခဲ့ရာ ဆေးရုံဝန်ထမ်းအိမ်ရာ (၄)ထပ်ဆောင်၏ ဝင်ပေါက်ခြံစည်းရိုးဘေးသို့ ကျရောက်ပေါက်ကွဲခဲ့ကြောင်း ရဲတပ်ဖွဲ့မှ ပြောဆိုထားသည်။

ထိုသို့ကျရောက်ပေါက်ကွဲမှုကြောင့် အဆိုပါ (၄)ထပ်ဆောင်၏ အုတ်နံရံ၊ ပြတင်းပေါက်မှန် ၁၄ ချပ်၊ ၁ထပ်တိုက်၏ ပြတင်းပေါက်မှန် ၃ချပ်နှင့် KLUGER အမျိုးအစားကား၏ ယာဘက်တံခါးနှင့် ဘောနက်ဖုံးတို့တွင် ဗုံးစထိမှန်ပျက်စီးသွားခဲ့ကြောင်း သိရသည်။

ထို့ပြင် ဆေးရုံရှေ့လမ်းမပေါ်တွင် ဆိုင်ကယ်ဖြင့်ဖြတ်သန်းသွားသည့် နမ့်ဘော်ဝမ်(က)ရပ်ကွက်နေ ကိုဇင်မျိုးထက်(၂၁)နှစ်တွင် ဗုံးစထိမှန်ဒဏ်ရာများရရှိခဲ့ကြောင်း သိရသည်။

အထက်ပါဖြစ်စဉ်တွင် ပါဝင်ပတ်သက်သူများအား ဖမ်းဆီးအရေးယူနိုင်ရေးနှင့် နယ်မြေဒေသတည်ငြိမ်အေးချမ်းရေးအတွက် လုံခြုံရေးတပ်ဖွဲ့ဝင်များက လိုအပ်သည့်လုံခြုံရေး လုပ်ငန်းစဉ်များနှင့်အညီဆက်လက်လုပ်ဆောင်လျက်ရှိကြောင်း ရဲတပ်ဖွဲ့မှ သတင်းထုတ်ပြန်ထားသည်။