ယွန်း (NSS) - ဇူလိုင် ၂

စနစ်ဟောင်းဖြင့် သင်ကြားခဲ့သည့် (၁ဝ)တန်းကို အကြောင်းအမျိုးမျိုးကြောင့် မတက်ရသေးသူများအနေဖြင့် သင်ရိုးသစ်ဖြင့် သင်ကြားနေသည့် တက္ကသိုလ်ဝင်စာမေးပွဲတွင် ဝင်ရောက်ဖြေဆိုနိုင်ကြောင်း နစကမှ အသိပေးပြောဆိုထားသည်။

နစကမှ ပြီးခဲ့သည့် ရက်ပိုင်းတွင် မီဒီယာများကို အထက်ပါကဲ့သို့ အသိပေးပြောဆိုထားခြင်းဖြစ်သည်။

စနစ်ဟောင်းဖြင့် သင်ကြားခဲ့သည့် (၉)တန်းစာမေးပွဲကို အောင်မြင်ပြီးသော်လည်း အကြောင်း အမျိုးမျိုးကြောင့် စနစ်ဟောင်း(၁ဝ)တန်းကို မတက်ရောက်ရသေးသော ကျောင်းသား၊ ကျောင်းသူများရှိနေကြောင်း သိရသည်။ 

လက်ရှိတွင် ၎င်းတို့အတွက် စနစ်ဟောင်းအတန်းများမရှိတော့ဘဲ သင်ရိုးသစ်ဖြင့် သင်ကြားနေသည့် တက္ကသိုလ်ဝင်စာမေးပွဲ၌ ပြင်ပတွင်စာများလေ့လာ၍ ဝင်ရောက်ဖြေဆိုနိုင်ကြောင်း နစကမှ အသိပေးပြောဆိုထားသည်။

အလားတူ (၁ဝ)တန်းစနစ်ဟောင်းကို ဝင်ရောက်ဖြေဆိုပြီး ကျရှုံးခဲ့သော ကျောင်းသားများအနေဖြင့်လည်း ကျောင်းဆက်လက်တက်ရောက်ခွင့်ရှိမည် မဟုတ်ကြောင်း သိရသည်။

၎င်းတို့အနေဖြင့် ကိုယ်တိုင်လေ့လာ၍ဖြစ်စေ၊ ပြင်ပသင်တန်းများတက်ရောက်၍ ဖြစ်စေ လေ့လာသင်ယူပြီး Grade-12 သင်ရိုးသစ် တက္ကသိုလ်ဝင်ခွင့် စာမေးပွဲကို ဝင်ရောက်ဖြေဆိုခွင့်ပြုမည်ဖြစ်ကြောင်း ထုတ်ပြန်ချက်တွင် ထည့်သွင်းပြောဆိုထားသည်။

ပြီးခဲ့သည့် စနစ်ဟောင်းတက္ကသိုလ်ဝင်စာမေးပွဲကို မတ်လ(၈)ရက်မှစတင်ကာ မတ်လ (၁၈) ရက်အထိ ကျင်းပခဲ့ပြီး ဝင်ရောက်ဖြေဆိုသူ စုစုပေါင်း(၁၆၁၈၅ဝ)ဦး ရှိခဲ့ရာ အောင်မြင်သူ (၁ဝ၉၈၅၁)ဦး ရှိခဲ့ခြင်းကြောင့် အောင်ချက်ရာခိုင်နှုန်းသည် (၆၇ ဒသမ ၈၇) ရာခိုင်နှုန်း ဖြစ်ကြောင်း သိရသည်။

ယင်းစာမေးပွဲကို ရန်ကုန်တိုင်းဒေသကြီးမှ ဝင်ရောက်ဖြေဆိုသူအများဆုံးဖြင့်စုစုပေါင်း(၂၃၈ဝ၇)ဦးရှိခဲ့ကာ အောင်ချက်ရာခိုင်နှုန်းအနေဖြင့် (၆၄ ဒသမ ၂ဝ) ရာခိုင်နှုန်း ရှိကြောင်း သိရသည်။