NSS - ဇွန် ၂၉

မွန်ပြည်နယ်၊ သထုံမြို့နယ် နှင့် ဘီးလင်းမြို့နယ်အစပ်ရှိ မိုင်းခွဲဖျက်ဆီးခံခဲ့ရသည့် ကျုံအိတ်တံတား၌ လုံခြုံရေးလုပ်ငန်းများ ဆောင်ရွက်နေစဉ် Drop Bomb များ ပစ်ချတိုက်ခိုက်ခံရမှုကြောင့် (၃)ဦးထက်မနည်း သေဆုံးပြီး (၂၈)ဦးထက်မနည်း ထိခိုက်ဒဏ်ရာရရှိခဲ့ကြောင်း လုံခြုံရေးအဖွဲ့နှင့် နီးစပ်သော သတင်းအရင်းအမြစ်ထံမှ သိရသည်။ 

ယနေ့(ဇွန်လ ၂၉ ရက်)၊ နံနက် (၄) နာရီခွဲအချိန်ခန့်တွင် မွန်ပြည်နယ်၊ သထုံမြို့နယ် နှင့် ဘီးလင်းမြို့နယ်အစပ်ရှိ အလျား (၉၅)ပေ၊ အကျယ်(၃၆)ပေရှိသည့် သံကူကွန်ကရစ်တံတား အမျိုးအစား ကျုံအိတ်တံတားအား KNU/PDF များမှ မိုင်းထောင်ဖောက်ခွဲဖျက်ဆီးခဲ့သည့် ဖြစ်စဉ်ဖြစ်ပွားခဲ့သည်။

ယင်းဖြစ်စဉ်ကြောင့် အဆိုပါတံတား၌ လုံခြုံရေးတပ်ဖွဲ့ဝင်များသည် ရန်ကုန်-မော်လမြိုင် ကားလမ်းမပေါ်တွင်ဖြတ်သန်းသွားလာသော ယာဉ်များယာဉ်ကြောပိတ်ဆို့မှုမရှိစေရေး လမ်းရှင်းလင်းဆောင်ရွက်ပေးပြီး လုံခြုံရေးလုပ်ငန်းများ ဆောင်ရွက်ခဲ့ကြောင်း သိရသည်။ 

ထိုသို့ ဆောင်ရွက်နေစဉ် နံနက် (၈)နာရီ အချိန်ခန့်တွင် အကြမ်းဖက်သမားများမှ Drone ဖြင့် Drop Bomb (၅)လုံးခန့်ချ၍ တိုက်ခိုက်ခဲ့ကြောင်း အထက်ပါသတင်းအရင်းအမြစ်မှဆိုသည်။ 

တိုက်ခိုက်ခံရမှုကြောင့် လုံခြုံ‌ရေးတပ်ဖွဲ့ဝင် (၁၂)ဦး၊ ရဲတပ်ဖွဲ့ဝင်(၉)ဦး၊ ထွေ/အုပ် (၂)ဦး၊ မီးသတ်တပ်ဖွဲ့ဝင် (၃)ဦး နှင့် ရွှေသံလွင်ဝန်ထမ်း(၂)ဦး  စုစုပေါင်း (၂၈)ဦး ဒဏ်ရာရရှိခဲ့ပြီး ခရိုင်လမ်းဦးစီးမှူး (၁)ဦး သေဆုံးခဲ့ကြောင်းသိရသည်။

လက်ရှိတွင် ၎င်းတို့အား သထုံခရိုင်ပြည်သူ့ ဆေးရုံသို့ ပို့ဆောင်ပေးထားကြောင်း သိရသည်။

နစက သတင်းထုတ်ပြန်ရေးအဖွဲ့ဘက်ကလည်း ကျုံအိတ်တံတား မိုင်းထောင်ဖောက်ခွဲဖျက်ဆီးခံရမှုဖြစ်စဉ်နှင့်ပတ်သက်ပြီး မိုင်းဖောက်ခွဲမှုကြောင့် တံတား၏ အနောက်ဘက်ခြမ်း ၆၆ ပေခန့်ပဲ့ကျပျက်စီးခဲ့ကာ ဖြစ်စဉ်ဖြစ်ပွားချိန်၌ တံတားပေါ်တွင် ဖြတ်သန်းမောင်းနှင်နေသည့် မော်တော်ယာဉ် ၃ စီးပြုတ်ကျပျက်စီးခဲ့ကာ အပြစ်မဲ့ပြည်သူ တစ်ဦးသေဆုံးခဲ့ပြီး တစ်ဦး ဒဏ်ရာ ရရှိခဲ့ကြောင်း ထုတ်ပြန်ထားသည်။

အလားတူ အဆိုပါနေရာသို့ လုံခြုံရေး တပ်ဖွဲ့ဝင်များနှင့် ဌာနဆိုင်ရာတာဝန်ရှိသူများ ကူညီကယ်ဆယ်ရေးလုပ်ငန်းများ သွားရောက်ဆောင်ရွက်ပေးစဉ် အကြမ်းဖက်သမားများက Drop Bomb များအသုံးပြု၍ ထပ်မံတိုက်ခိုက်မှုကြောင့် အပြစ်မဲပြည်သူ (၂)ဦးထပ်မံသေဆုံးခဲ့ပြီး (၁ဝ)ဦးဒဏ်ရာရရှိခဲ့ကာ လုံခြုံရေးတပ်ဖွဲ့ဝင်အချို့ ထိခိုက်ဒဏ်ရာရရှိခဲ့ကြောင်း ထုတ်ပြန်ထားသည်။