NSS - ဇွန် ၂၈

မန္တလေးမြို့၊ ပုသိမ်ကြီးမြို့နယ် နန်းဦးလွင်ကျေးရွာရှိ နေအိမ်တစ်ဝက်ခန့်ကို လာမည့် ၂ဝ၂၃ ခုနှစ် ဇူလိုင်လ(၆)ရက် နောက်ဆုံးထားပြီး ဖယ်ရှားပေးရန် သက်ဆိုင်ရာက စာထုတ်ပြန်ထားကြောင်း သိရသည်။

အဆိုပါ ကျေးရွာရှိ လယ်ယာမြေပေါ်တွင် ခွင့်ပြုချက်မရှိဘဲ ဆောက်လုပ်ထားသည့် နေအိမ်၊ အဆောက် အအုံများကို ဖယ်ရှားပေးရန် နစက၏ မြို့နယ်လယ်ယာမြေစီမံခန့်ခွဲမှုကော်မတီက စာများကပ်ကာ ထုတ်ပြန်ထားခြင်းဖြစ်ကြောင်း သိရသည်။

"နန်းဦးလွင် တစ်ခုလုံးဖျက်တာမဟုတ်ပါဘူး။ ရွာခြေကနေစပြီး လယ်မြေထဲအကွက်ရိုက်ထားတာတွေ၊ တာဝါတိုင်နားတွေနဲ့ ဆည်မြောင်းနားက အိမ်တွေပဲ စာကပ်သွားပါတယ်။ အနားပတ်ဝန်းကျင်က ရွာမြေတွေ၊ အခြားနည်းကျပြီး မြေပေါ်ဆောက်ထားတဲ့ အဆောက်အဦးတွေနဲ့ ဂရံမြေအမျိုးမျိုးပေါ်ဆောက်ထားတဲ့အဆောက်အဦးတွေ မပါဘူး"ဟု ဒေသခံအိမ်ခြံမြေဝန်ဆောင်မှုလုပ်ငန်းရှင်တစ်ဦးက ပြောသည်။

ထုတ်ပြန်စာတွင် လယ်ယာမြေဥပဒေပုဒ်မ(၁၂)ပါ စည်းကမ်းချက်များကို လိုက်နာရန်ပျက်ကွက်ကြောင်း စိစစ်တွေ့ရှိရသဖြင့် မြို့နယ်လယ်ယာမြေစီမံခန့်ခွဲမှုအဖွဲ့၏ ဇွန်လ(၂၆)ရက်က ပြုလုပ်သော အစည်းအ ဝေးဆုံးဖြတ်ချက်ဖြင့် လယ်ယာမြေဥပဒေ ပုဒ်မ-၁၉ ခ အရ  လယ်ယာမြေပေါ်တွင် ခွင့်ပြုချက်မရှိ ဆောက်လုပ်ထားသော အဆောက်အအုံများကို ဖယ်ရှားရခြင်းဖြစ်ကြောင်း ဖော်ပြထားသည်။

လယ်မြေပေါ်တွင်ခွင့်ပြုချက်မရှိဘဲတည်ဆောက်ထားကြောင်း သတ်မှတ်ခြင်းခံရသောအိမ်အများစုသည် ကံကောက်အရှေ့ရွာနှင့်နန်းဦးလွင်ကွက်သစ်ရွာများမှဖြစ်ပြီး အိမ်ခြေရာချီနိုင်ကြောင်းဒေသခံများက ပြောသည်။