စော (NSS) - ဇွန် ၂၅

ရန်ကုန်တိုင်း၊ ကမာရွတ်မြို့နယ်တွင် တက္ကသိုလ်ကျောင်းသားတစ်ဦးပေါ်သို့ နှစ်ချို့သရက်ပင်လဲကျမှုဖြစ်ပွားခဲ့ကြောင်း သိရသည်။

ဖြစ်စဉ်မှာ ယမန်နေ့(ဇွန်လ ၂၄ ရက်)၊ ညနေ(၄)နာရီခွဲဝန်းကျင်အချိန်တွင် ကမာရွတ်မြို့နယ်၊ တက္ကသိုလ်ရိပ်သာလမ်းမပေါ်၌ အထက်ပါကဲ့သို့ဖြစ်ပွားခဲ့ကြောင်း သွေးဒါနမျိုးဆက်လူမှုကူညီရေးအသင်းထံမှ သိရသည်။

“မနေ့က  မိုးကလည်း ကောင်းတယ် လေလည်းနည်းနည်းပါတယ်။ သူကစက်ဘီးနင်းလာတဲ့အချိန် နှစ် ချို့ သရက်ပင်ကလဲကျသွားတာလို့ထင်တယ်။ မိသားစုနဲ့တော့ အဆက်အသွယ်ရပါပြီ”ဟု သွေးဒါနမျိုး ဆက်လူမှုကူညီရေးအသင်းမှ တာဝန်ရှိသူတစ်ဦးက NP News ကိုပြောသည်။

သရက်ပင်လဲကျမှုကြောင့် အဆိုပါ အမျိုးသား၏ ကျောရိုးနှင့် ဘယ်ဘက်ခြေထောက် ကျိုးကြေခဲ့ကြောင်း ၎င်းကဆက်လက်ပြောဆိုခဲ့သည်။

ထိခိုက်ဒဏ်ရာရရှိခဲ့သော အမျိုးသားကို ကံကော်မြေလူမှုကူညီရေးအသင်းမှ ရန်ကုန်ပြည်သူ့ဆေးရုံကြီးသို့ ပို့ဆောင်ထားကြောင်း သိရသည်။

အဆိုပါ အမျိုးသားသည် မောင်ကောင်းခန့်သွေး (၁၉)နှစ်ဖြစ်ပြီး ရွာသာကြီးတက္ကသိုလ်တွင် ပညာသင်ကြားနေသော ကျောင်းသားတစ်ဦးဖြစ်ကြောင်း သိရသည်။