Pearl (NSS) - ဇွန် ၂၅

ပဲခူးမြို့၊ ဟံသာဝတီမြို့ဟောင်းကျုံးအတွင်း ဆယ်ကျော်သက်အရွယ် ယောက်ျားလေးတစ်ဦးနှင့် မိန်းကလေး (၂)ဦးတို့ ရေဆင်းကစားရာမှ ရေနစ်သွားခဲ့ကြောင်း ပဲခူးမြို့နယ် မီးသတ်စခန်းထံမှ သိရသည်။ 

ဖြစ်စဉ်မှာ ယမန်နေ့ (ဇွန်လ ၂၄ ရက်) ၊ ညနေ (၃)နာရီခွဲ အချိန်ခန့်တွင် ပဲခူးမြို့ ၊ ရှင်စောပုရပ်ကွက်၊ ဟံသာဝတီကျုံးကူး တံတားအနီး၊ ဟံသာဝတီမြို့ဟောင်းကျုံးအတွင်း ဖြစ်ပွားခဲ့ကြောင်း သိရသည်။ 

ပဲခူးမြို့ ၊ ဥဿာ (၆)ရပ်ကွက်တွင် နေထိုင်သော မောင်သုတထက် (၁၈)နှစ်၊ မထက်ပွင့်ဖြူ (၁၈)နှစ် နှင့် မသက်နှင်းစံ (၁၃)နှစ်တို့သည် အဆိုပါကျုံးအတွင်းရေဆင်းကစားရင်း မောင်သုတထက်သည်ရေနစ်သွားခဲ့ပြီး ၎င်းအား ဆင်းကယ်ရာမှ (၃)ဦးလုံး ရေနစ်သွားခဲ့ကြောင်း သိရသည်။  

"သူတို့က စက်ဘီးနဲ့လာပြီး ရေဆင်းကစားတဲ့ပုံစံမျိုး၊ ကျုံးဟောင်းကလျှောဆင်းပြီး ရေဆော့တာမျိုးပေါ့။  အဲဒီလို လျှောဆင်းပြီး တစ်‌ယောက်က ရေနစ်တော့ ဆင်းကယ်ရင် (၃)ယောက်လုံးနစ်သွားတာ"ဟု ပဲခူးမြို့နယ်မီးသတ်၏ တာဝန်ရှိသူတစ်ဦးက NP News ကိုပြောသည်။ 

အဆိုပါရေနစ်သူများအနက်မှ မထက်ပွင့်ဖြူအား ဇွန်လ ၂၄ရက် ၊ ညနေ (၄)နာရီအချိန်ခန့်တွင် သေဆုံးလျက်ပြန်လည်တွေ့ရှိခဲ့ပြီး မသက်နှင်းစံအား ယနေ့ (ဇွန်လ ၂၅ ရက်) ၊ နံနက် (၈)နာရီ အချိန်ခန့်တွင် ၎င်းရုပ်အလောင်းအား ပြန်လည်တွေ့ရှိခဲ့ကြောင်း သိရသည်။ 

လက်ရှိတွင်  ကျန်ရှိသော မောင်သုတထက်အား ရှာဖွေရေးလုပ်ငန်းများ ဆက်လက်ဆောင်ရွက်လျက်ရှိကြောင်း အထက်ပါ တာဝန်ရှိသူမှ ဆက်လက်ပြောဆိုထားသည်။