Pearl (NSS) – ဇွန် ၂၄ 

စစ်ကိုင်းတိုင်း၊ ကလေးမြို့နယ်တွင် မော်တော်ယာဉ်တစ်စီး တံတားပေါ်မှ ပြုတ်ကျမှုဖြစ်ပွားပြီး ကလေးငယ်တစ်ဦးအပါအဝင် (၆)ဦး သေဆုံးသွားခဲ့ကြောင်း ဒေသခံတစ်ဦးထံမှ သတင်းရရှိသည်။ 

ယနေ့ (ဇွန်လ ၂၄ ရက်)၊ မွန်းတည့် ၁၂ နာရီဝန်းကျင်အချိန်ခန့်တွင် ကလေးမြို့နယ်၊ ရာဇဂြိုလ်ရွာအနီး၌ ဖြစ်ပွားခဲ့ကြောင်းသိရသည်။ 

ဦးမာန်ခင်း မောင်းနှင်၍ ခရီးသည်များ လိုက်ပါလာသော ကားတစ်စီးသည် ကလေးမြို့နယ်၊ ရာဇဂြိုလ်ကျေးရွာဘက်မှ တွန်းဇံမြို့နယ်၊ ရှာလ်ထောဇန်ရွာဘက်သို့မောင်းနှင်လာခဲ့ကြောင်း သိရသည်။ 

ထိုသို့မောင်းနှင်လာစဉ် ရာဇဂြိုလ်တံတားပေါ်သို့ အရောက်၌ မော်တော်ယာဉ်သည် တံတားပေါ်မှ ဘေးချော်၍အောက်သို့ ပြုတ်ကျသွားခဲ့ကြောင်း အထက်ပါ သတင်းအရင်းအမြစ်မှ ဆိုသည်။

ဖြစ်စဉ်ကြောင့် ယာဉ်မောင်းနှင့် ယာဉ်ပေါ်တွင် လိုက်ပါလာသော ကလေးငယ်တစ်ဦးအပါအဝင် (၆)ဦးသည် အခင်းဖြစ်နေရာတွင် သေဆုံးသွားခဲ့ပြီး ခရီးသည်အချို့ ထိခိုက်ဒဏ်ရာရရှိခဲ့ကြောင်း သိရသည်။ 

လက်ရှိတွင် ၎င်းတို့အား ရာဇဂြိုလ် တိုက်နယ်ဆေးရုံကိုပို့ဆောင်ပေးထားကြောင်း သိရသည်။