NSS - ဇွန် ၂၄

ရှမ်းပြည်နယ်၊ ကိုးကန့်ကိုယ်ပိုင်အုပ်ချုပ်ခွင့်ရဒေသ၊ လောက်ကိုင်မြို့၌ လက်နက်ကိုင်အဖွဲ့ အချင်းချင်းကြား အပြန်အလှန် ပစ်ခတ်မှုဖြစ်ပွားကာ ထိခိုက်သေဆုံးမှုများရှိခဲ့ကြောင်း သတင်းရရှိသည်။

ဖြစ်စဉ်မှာ ယမန်နေ့(ဇွန်လ ၂၃ ရက်)၊ ည ၈ နာရီခွဲအချိန်တွင် လောက်ကိုင်မြို့၊ ရပ်ကွက်(၃)ရှိ ကျင်ဟိုင်ဟိုတယ်အနီးတွင် အထက်ပါကဲ့သို့ ပစ်ခတ်မှုဖြစ်ပွားခဲ့ခြင်းဖြစ်ကြောင်း လောက်ကိုင်မြို့ခံတစ်ဦးက NP News ကို ပြောသည်။

“ဘာလို့ ပစ်ခတ်မှုဖြစ်သွားတာလဲဆိုတာတော့ မသိဘူး။ ပစ်ခတ်သံတွေကတော့ တော်တော်လေးကို ဆူဆူညံညံကြားရတယ်။ တစ်ဦးကတော့ သေသွားတယ်။ နောက်ဒဏ်ရာရရှိတဲ့လူတွေလည်း ရှိတယ်။ သေသွားတဲ့လူရဲ့ အလောင်းကိုတော့ ပြည်သူ့စစ်အဖွဲ့ရဲ့ ကားနဲ့သယ်သွားတာတွေ့လိုက်တယ်” ဟု လောက်ကိုင်မြို့ခံက ဆိုသည်။

လောက်ကိုင်မြို့၌ ပစ်ခတ်မှုဖြစ်စဉ်သည် လက်နက်ကိုင် ပြည်သူ့စစ်အဖွဲ့အချင်းချင်းအကြား ပစ်ခတ်မှုသာဖြစ်နိုင်ကြောင်းလည်း ၎င်းက ထပ်မံပြောဆိုထားသည်။

“လောက်ကိုင်မှာ နည်းနည်းရှုပ်တယ်။ ပြည်သူ့စစ်အဖွဲ့တင်ပဲ (၁ဝ)ဖွဲ့လောက်ရှိတယ်။ ရဲဆိုရင်လည်း ကုမ္ပဏီက ခန့်ထားတဲ့ ရဲတွေ၊ သူဋ္ဌေးတွေက ခန့်ထားတဲ့ ရဲတွေဆိုပြီး ရှိတယ်။ ကျွန်တော်တို့ကြားတာတော့ ပြည်သူ့စစ်အချင်းချင်း ပစ်တယ်လို့ပဲကြားတယ်” ဟု လောက်ကိုင်မြို့ခံက ဆိုသည်။

အထက်ပါကဲ့သို့ လက်နက်ကိုင်အဖွဲ့အချင်းချင်းအကြား အပြန်အလှန်ပစ်ခတ်မှုဖြစ်စဉ်အတွင်း အမျိုးသားတစ်ဦးသေဆုံးခဲ့ကာ ထိခိုက်ဒဏ်ရာရသူများရှိခဲ့သည့်အပြင် အဆောက်အဦးအချို့မှာလည်း ထိခိုက်ပျက် စီးမှုများရှိခဲ့ကြောင်း သိရသည်။

လောက်ကိုင်မြို့ပေါ်၌ ပြီးခဲ့သော ကာလများအတွင်းကလည်း အပြန်အလှန်ပစ်ခတ်မှုဖြစ်စဉ်များ ရှိခဲ့ဖူးပြီး မကြာခဏ ပစ်ခတ်မှုများ ဖြစ်ပေါ်နေကြောင်း လောက်ကိုင်မြို့ခံများက ဆိုထားသည်။