NSS - ဇွန် ၂၂

နိုင်ငံခြားသို့ ပြည်တွင်းမှ အလုပ်သမားများ ပို့ဆောင်ပေးနေသည့် ပြည်ပအလုပ်အကိုင်အေဂျင်စီ (၆)ခုကို လုပ်ငန်းလိုင်စင် ယာယီပိတ်သိမ်းကြောင်း အလုပ်သမားညွှန်ကြားမှုဦးစီးဌာန(အလည)၏ ထုတ်ပြန်ချက်အရ သိရသည်။

လုပ်ငန်းလိုင်စင် ပိတ်သိမ်းခံခဲ့ရသည့် ပြည်ပအလုပ်အကိုင်အေဂျင်စီ (၆)ခုသည် ထိုင်းနိုင်ငံသို့ ပြည်တွင်းမှ အလုပ်သမားများ ပို့ဆောင်ပေးနေသည့် အေဂျင်စီများဖြစ်ကြပြီး အေဂျင်စီ (၃)ခုကို (၆)လနှင့် အေဂျင်စီ (၃)ခုကို (၁)နှစ် ယာယီလိုင်စင်ပိတ်သိမ်းခြင်းဖြစ်ကြောင်း သိရသည်။

နိုင်ငံရပ်ခြားသို့ ပြည်တွင်းမှ အလုပ်သမား ပို့ဆောင်ပေးနေသည့် အေဂျင်စီပေါင်း (၁၅၇)ခုရှိသည့်အနက် (၆)ခုကို ယာယီပိတ်သိမ်းကြောင်း ယနေ့ (ဇွန်လ ၂၁ ရက်)တွင် ထုတ်ပြန်ကြေညာခဲ့ခြင်းဖြစ်ကြောင်း သိရသည်။

လုပ်ငန်းလိုင်စင် ယာယီပိတ်သိမ်းခံခဲ့ရသည့် အေဂျင်စီ (၆) ခုသည် မင်္ဂလာတောင်ညွန့်မြို့နယ်ရှိ 'ရွှေမန္တာလာမေ'၊ မရမ်းကုန်းမြို့နယ်ရှိ 'မြင့်မြတ်တံခွန်'၊ အင်းစိန်မြို့နယ်ရှိ 'ပိုးပိုးနှင့် ဖြိုးသန္တာထွန်း'၊ သင်္ဃန်းကျွန်းမြို့နယ်ရှိ 'Top Choice Man Power'၊ မြောက်ဒဂုံမြို့နယ်ရှိ 'ရွှေဖြိုးသာ'နှင့် လှိုင်မြို့နယ်ရှိ 'ဖြူစင်မေ'တို့ ဖြစ်ကြောင်း ထုတ်ပြန်ချက်အရသိရသည်။

အဆိုပါပြည်ပအလုပ်အကိုင်အေဂျင်စီ (၆)ခုကို မည်သည့်အကြောင်းကြောင့် လုပ်ငန်းလိုင်စင်များ ယာယီပိတ်သိမ်းခဲ့ခြင်းဖြစ်ကြောင်း မသိရသေးဘဲ ရွှေမန္တလာမေ‌အေဂျင်စီ၊ မြင့်မြတ်တံခွန်‌အေဂျင်စီ၊ ပိုးပိုးနှင့် ဖြိုးသန္တာထွန်းအေဂျင်စီတို့ကို (၆) လစီနှင့် Top Choice Man Power အေဂျင်စီ၊ ရွှေဖြိုးသာအေဂျင်စီ၊ ဖြူစင်မေအေဂျင်စီတို့ကို (၁)နှစ်စီ အသီးသီးလိုင်စင်ပိတ်သိမ်းခဲ့ခြင်းဖြစ်ကြောင်း သိရသည်။

ပြည်ပနိုင်ငံများသို့ သွားရောက်ရန်အတွက် သက်ဆိုင်ရာသင်တန်း တက်ရောက်ပြီးသူများကို အကြောင်းပြချက် ခိုင်လုံမှုမရှိဘဲ အချိန်မီစေလွှတ်ခြင်းမရှိသည့် ပြည်ပအလုပ်အကိုင်အေဂျင်စီများကို လိုင်စင်ပိတ်သိမ်း အရေးယူသွားမည်ဖြစ်ကြောင်းအလုပ်သမားညွှန်ကြားမှုဦးစီးဌာန (အလည)မှ ပြီးခဲ့သည့် ဇွန်လ ၁၈ ရက်ကလည်း ထုတ်ပြန်ထားခဲ့ပြီးဖြစ်သည်။