NSS - ဇွန် ၂၁

တွံတေးမြို့ပြပြောက်ကျားအဖွဲ့က ဒလန်ဟုစွပ်စွဲကာ လုပ်ကြံသတ်ဖြတ်မှု (၁ဝ)ကြိမ်နှင့် ဓါးပြတိုက်မှု (၃)ကြိမ် ကျူးလွန်ထားသောအခြေအနေများကို နစကမှ ထုတ်ဖော်အသိပေးလိုက်သည်။

နိုင်ငံတော်စီမံအုပ်ချုပ်ရေးကောင်စီ၏ သတင်းထုတ်ပြန်ရေးအဖွဲ့က ယမန်နေ့(ဇွန်လ ၂ဝ ရက်) ညပိုင်းတွင် အထက်ပါကဲ့ ထုတ်ပြန်အသိပေးခဲ့ခြင်းဖြစ်သည်။

ရန်ကုန်တိုင်း၊ မြောက်ဥက္ကလာပမြို့နယ်ရှိ မြတ်မောင်စိန်ရွှေရတနာဆိုင်အား ဓါးပြတိုက်မှုတွင် ပူးပေါင်းပါဝင်သူ (၉)ဦးဖြစ်သော ကိုကိုအောင်၊ ပပလှိုင်၊ ကောင်းထက်စံ၊ ကျော်ဇင်လတ်၊ ကောင်းမြတ်၊ ဖြိုးကိုကို၊ ကျော်ဇင်ဝေ၊ စောဂျိုးဇက်နှင့် ထွန်းထွန်းနိုင်တို့ကို ဖမ်းဆီးရမိထားကြောင်း နစကမှ ထုတ်ပြန်ခဲ့သည်။

၎င်းဓါးပြတိုက်မှုဖြစ်စဉ်အတွင်း ဖမ်းဆီးရမိခဲ့သော ဖြိုးကိုကိုသည် ပြီးခဲ့သော ၂ဝ၂၁ ခုနှစ်၊ နိုဝင်ဘာလ၌ KNLA တပ်မဟာ (၆)နယ်မြေတွင် အကြမ်းဖက်ဖောက်ခွဲရေးသင်တန်းကို တက်ရောက်ခဲ့သူဖြစ်ကြောင်း စစ်ဆေးဖော်ထုတ်သိရှိရသည်ဟု နစကမှ ဆိုသည်။

ထို့ပြင် ဓါးပြတိုက်မှုဖြစ်စဉ်အတွင်း ဖမ်းဆီးရမိခဲ့သော ကိုကိုအောင်၊ ကောင်းမြတ်၊ ကျော်ဇင်ဝေနှင့် ကောင်းထက်စံတို့ (၄) ဦးသည်လည်း ၂ဝ၂၂ ခုနှစ် ဇန်နဝါရီလတွင် ရန်ကုန်တိုင်း၊ တွံတေးမြို့နယ်၊ ဂယက်လက်မီးကျေးရွာ၌ တွံ့တေးမြို့ပြပြောက်ကျားအမည်ခံ အကြမ်းဖက်အဖွဲ့က ဖွင့်လှစ်သည့် ဖောက်ခွဲရေးသင်တန်းကို တက်ရောက်ခဲ့သူများဖြစ်ကြောင်း ထုတ်ပြန်ထားသည်။

ရန်ကုန်မြို့အတွင်း၌ အကြမ်းဖက်လုပ်ငန်းများဆောင်ရွက်ရန်အတွက် တွံတေးမြို့ပြပြောက်ကျားအဖွဲ့ကို ၂ဝ၂၂ ခုနှစ် ဇန်နဝါရီလ၌ ဆံရှည်(ခ)ကိုထက်နှင့် ချမ်းမြေ့အောင်တို့မှ ခေါင်းဆောင်ကာ အထက်ပါဓါးပြတိုက်မှုအတွင်း ဖမ်းဆီးရမိခဲ့သော ကိုကိုအောင်၊ ဖြိုးကိုကို၊ ကောင်းမြတ်၊ ကျော်ဇင်ဝေ၊ ကျော်ဇင်လတ်၊ ကောင်းထက်ခံတို့အပါအဝင် (၂၅)ဦးဖြင့် ဖွဲ့စည်းခဲ့ခြင်းဖြစ်ကြောင်း နစကမှ ထုတ်ဖော်ပြောဆိုထားသည်။

ထို့ပြင် ဓါးပြတိုက်မှုဖြစ်စဉ်အတွင်း ဖမ်းဆီးရမိခဲ့သော လက်နက်ခဲယမ်းအများအပြားကို ပြောက်ကျားအဖွဲ့ခေါင်းဆောင် ဆံရှည်(ခ)ကိုထက်၏ ချိတ်ဆက်ပေးမှုဖြင့် ဖြိုးကိုကိုက တွံ့တေးမြို့နယ်၊ ညောင်တံခါးကျေးရွာအနီးတွင် ချမ်းမြေ့ထံမှ နှစ်ကြိမ်ခွဲကာ သွားရောက်ယူခဲ့ပြီး ၎င်းလက်နက်ခဲယမ်းများအား တွံတေးမြို့နယ်နှင့် ရန်ကုန်မြို့အတွင်း အကြမ်းဖက်လုပ်ငန်းများ ဆောင်ရွက်ရာတွင် အသုံးပြုရန်အတွက် ဖြစ် ကြောင်း သိရသည်။

လက်ရှိအချိန်ထိ ပြောက်ကျားအဖွဲ့ခေါင်းဆောင် ဆံရှည်(ခ)ကိုထက်နှင့် ချမ်းမြေ့အောင်တို့၏ ခိုင်းစေမှုများအရ တွံတေးမြို့နယ်နှင့် ရန်ကုန်မြို့အတွင်း၌ အကြမ်းဖက်လုပ်ကြံသတ်ဖြတ်မှု (၁ဝ)ကြိမ်၊ ဓါးပြတိုက်မှု (၃)ကြိမ် ဆောင်ရွက်ခဲ့ကြောင်း ဖော်ထုတ်သိရသည်ဟု နစကမှ ထုတ်ပြန်ထားသည်။

အဆိုပါပြောက်ကျားအဖွဲ့သည် ရန်ကုန်မြို့နှင့် တွံတေးမြို့နယ်၌ အုပ်ချုပ်ရေးမှူးများအပါအဝင် အပြစ်မဲ့ပြည်သူ (၂၃)ဦး ထက်မနည်းကို ဒလန်ဟုစွပ်စွဲကာ သေနတ်ဖြင့် လုပ်ကြံပစ်ခတ်သတ်ဖြတ်မှုများ ကျူးလွန်းထားကြောင်း နစကမှ ဖော်ထုတ်ထားသည်။

ထို့ပြင် ၎င်းအဖွဲ့သည် ရန်ကုန်မြို့ရှိ မြတ်မောင်စိန်ရွှေရတနာဆိုင်အပါအဝင် တွံတေးမြို့နယ်၊ ကျေးရွာ(၂) ခုရှိ လူနေအိမ်နှစ်လုံးတွင်လည်း ဓါးပြတိုက်လုယက်မှုများ ကျူးလွန်းထားကြောင်း နစကမှ ဆိုသည်။

လက်ရှိတွင် ဖမ်းဆီးရမိထားသူများကို ၎င်းတို့နှင့်ထိုက်တန်သည့် ပြစ်ဒဏ်များအား ဥပဒေနှင့်အညီ ထိရောက်စွာအရေးယူနိုင်ရေး ဆောင်ရွက်သွားမည်ဟု နစကမှ အသိပေးထုတ်ပြန်ထားသည်။

သို့သော် တွံတေးမြို့ပြပြောက်ကျားအဖွဲ့မှ ခေါင်းဆောင်(၂)ဦးဖြစ်သည့် ဆံရှည်(ခ)ကိုထက်နှင့် ချမ်းမြေ့အောင်တို့အား လက်ရှိတွင် ဖမ်းဆီးရမိရန်ကျန်နေသေးကြောင်းလည်း နစကမှ အသိပေးထားသည်။