စော (NSS)- ဇွန် ၁၈

ရန်ကုန်ပညာရေးတက္ကသိုလ်၌ ရှေးဦးကလေးပြုစုပျိုးထောင်ရေးနှင့် ဖွံ့ဖြိုးရေးဆိုင်ရာဘွဲ့လွန် ဒီပလိုမာသင်တန်းနှင့် ပညာရေးဒီပလိုမာသင်တန်းများဖွင့်လှစ်သွားမည်ဖြစ်ကြောင်း သိရသည်။

ရန်ကုန်ပညာရေးတက္ကသိုလ်ရှိ သင်တန်းရေးဌာနမှ ယခုရက်ပိုင်းအတွင်း အထက်ပါကဲ့သို့ အသိပေးကြေညာထားခြင်းဖြစ်သည်။

လျှောက်ထားလိုသူများအနေဖြင့် တက္ကသိုလ်တစ်ခုခုမှ ဘွဲ့ရရှိသူဖြစ်ရန်လိုပြီး အသက်ကန့်သတ်ချက်မရှိကြောင်း ထုတ်ပြန်ချက်အရသိရသည်။

ရှေးဦးကလေးပြုစုပျိုးထောင်ရေးနှင့် ဖွံ့ဖြိုးရေးဆိုင်ရာဘွဲ့လွန် ဒီပလိုမာသင်တန်းအတွက် ပညာသင်ယူကြားမည့် ကာလသည် (၁ဝ)လဖြစ်ပြီး ပညာရေး ဒီပလိုမာသင်တန်းအတွက် (၉)လကြာမြင့်မည်ဖြစ် ကြောင်း  သိရသည်။

ထို့ပြင် ဝင်ခွင့်စာမေးပွဲလျှောက်လွှာများကို ဇွန်လ (၂ဝ)ရက်တွင် ရန်ကုန်ပညာရေးတက္ကသိုလ်၌ စတင်ထုတ်ပေးသွားမည်ဖြစ်ကြောင်း ထုတ်ပြန်ချက်အရသိရသည်။

ရေဖြေစာမေးပွဲများကို ရှေးဦးကလေးပြုစုပျိုးထောင်ရေးနှင့် ဖွံ့ဖြိုးရေးဆိုင်ရာဘွဲ့လွန် ဒီပလိုမာ သင်တန်းအတွက် ဇူလိုင်လ (၁၃)ရက်တွင်လည်းကောင်း၊ ပညာရေး ဒီပလိုမာသင်တန်းအတွက် ဇူလိုင်လ (၁ဝ)ရက်တွင်လည်းကောင်း ဖြေဆိုရမည်ဖြစ်ကြောင်း သိရသည်။

လျှောက်လွှာများကို ဇူလိုင်လ(၇)ရက်နောက်ဆုံးထား ပေးပို့ရမည်ဖြစ်ပြီး သင်တန်းစတင်ဖွင့်လှစ်မည့်ရက်သည် ဩဂုတ်လ(၂)ရက်ဖြစ်ကြောင်း ထုတ်ပြန်ချက်အရသိရသည်။