Pearl (NSS) - ဇွန် ၁၈

ရန်ကုန်တိုင်း၊ မြောက်ဥက္ကလာပမြို့နယ်ရှိ မြတ်မောင်ရွှေဆိုင် ဓားပြတိုက်ခံရမှုဖြစ်ပွားခဲ့ကြောင်း လုံခြုံရေးအဖွဲ့နှင့် နီးစပ်သော သတင်းအရင်းအမြစ်ထံမှ သိရသည်။

ဖြစ်စဉ်မှာ ယနေ့ (ဇွန်လ ၁၈ ရက်) ၊ ညနေ (၄)နာရီခွဲအချိန်ခန့်တွင် မြောက်ဥက္ကလာပမြို့နယ်၊ (စျ)ရပ် ကွက်၊ (စျ)စျေးအနီးရှိ မြတ်မောင်ရွှေဆိုင်တွင် ဖြစ်ပွားခဲ့ကြောင်း သိရသည်။ 

အဆိုပါရွှေဆိုင်၌ ပိုင်ရှင်ဖြစ်သူ အပါအဝင် အရောင်းဝန်ထမ်း (၁၁)ဦး နှင့် လုံခြုံရေးဝန်ထမ်း(၅)ဦးတို့ ရှိနေစဉ်အချိန်၌ အကြမ်းဖက်သမား (၃)ဦးက ဆိုင်အတွင်း ဝင်ရောက်လာကာ သေနတ်အား မိုးပေါ်ထောင်ဖောက်ကာ ခြိမ်းခြောက်ဓားပြတိုက်ခဲ့ကြောင်း သိရသည်။

ထို့ပြင် အကြမ်းဖက်သမား (၃)ဦးသည် လုံခြုံရေးဝန်ထမ်း (၂)ဦးအား သေနတ်ဖြင့်ပစ်ခတ်ခဲ့ပြီးနောက် အသင့်ယူဆောင်လာသည့် တူများဖြင့် ရွှေဆိုင်၏ မှန်ကောင်တာများအား ရိုက်ခွဲကာ စိန်ရွှေလက်ဝတ်ရတနာ ပစ္စည်းမျိုးစုံကို ယူဆောင်ထွက်ပြေးသွားကြောင်းသိရသည်။

ထိုသို့ ပစ်ခတ်ခံရမှုကြောင့် လုံခြုံရေးဝန်ထမ်းကိုအောင်အောင်နှင့် ကိုလှမိုးတို့တွင်ကျည်ဖောက်ဝင်ဒဏ်ရာတို့ရရှိခဲ့ပြီး လက်တလော၌ မြောက်ဥက္ကလာပပြည်သူ့ဆေးရုံသို့ ပို့ဆောင်ပေးထားကြောင်း အထက်ပါ သတင်းအရင်းအမြစ်က ဆိုသည်။

အထက်ပါ ဓားပြတိုက်မှုဖြစ်စဉ်အတွင်း သေနတ်ပစ်ခတ်မှု (၁ဝ)ကြိမ်ထက်မနည်းရှိခဲ့ကြောင်းသိရပြီး အခင်းဖြစ်ပွားသည့်နေရာအနီးမှ ကျည်ခွံများလည်း တွေ့ရှိခဲ့ရကြောင်း ၎င်းမှ ဆက်လက်ပြောဆိုထားသည်။ 

လက်ရှိ နစက အစိုးရလက်ထက်တွင် ရန်ကုန် နှင့် မန္တလေးမြို့တို့ရှိ ရွှေထည်လက်ဝတ်ရတနာဆိုင်များဓားပြတိုက်လုယက်ခံရသည့်ဖြစ်စဉ်များ မကြာခဏဖြစ်ပွားလျက်ရှိနေသည်ကိုလည်း တွေ့ရသည်။