Pearl (NSS) - ဇွန် ၁၈

မန္တလေး၌ ဆိုင်ကယ်စီးလာသည့် အမျိုးသားအား  ဓားဖြင့်ခုတ်ကာ အုပ်စုဖွဲ့ ဆိုင်ကယ်လုယက်မှုဖြစ်ပွား ခဲ့ကြောင်း မဏီစလလူမှုကူညီရေးအသင်း(မန္တလေး)ထံမှ သိရသည်။

ဖြစ်စဉ်မှာ ယနေ့ (ဇွန်လ ၁၈ ရက်)၊  နံနက် (၁)နာရီခွဲအချိန်ခန့်တွင် မန္တလေးမြို့ ၊ မဟာအောင်မြေမြို့နယ်၊ 84 လမ်း/41×42 လမ်းကြားတွင်ဖြစ်ပွားခဲ့ကြောင်း သိရသည်။ 

အဆိုပါလမ်းကြားတွင် ကိုစိုးဝေယံ (၃၅) နှစ်သည် ဆိုင်ကယ်မောင်းနှင်လာစဉ် လူ (၉)ဦးခန့်မှ ဓားဖြင့်ထိုး၍ ၎င်းဆိုင်ကယ်အား လုယက်ယူဆောင်သွားခဲ့ကြောင်း သိရသည်။ 

" ပြတ်ရှရာတွေများတယ်၊ ပေါင်တွေ၊ နားရွက်တွေမှာပေါ့။ (၄/၅/၆)ချက်လောက်ရှိတယ် ၊ အသက်အန္တရာယ်ကတော့ မစိုးရိမ်ရဘူး။ (၉)ယောက်လောက်က လုတယ်ပြောတယ်။ မနက်(၁)နာရီဆိုတော့ လူပြတ်တာပေါ့။ သူကလည်း သူငယ်ချင်းကခေါ်လို့ အမရပူရဘက်ကို သွားတာလို့ပြောတယ်" ဟု အထက်ပါလူမှုကူညီရေးအသင်း၏ တာဝန်ရှိသူတစ်ဦးက NP News ကိုပြောသည်။ 

ဖြစ်စဉ်ကြောင့် ကိုစိုးဝေယံတွင် ပေါင်နှင့် နားရွက်တို့၌ ပြတ်ရှဒဏ်ရာများရရှိခဲ့ပြီး လက်ရှိတွင် ၎င်းအား မန္တလေးပြည်သူ့ဆေးရုံကြီးသို့ ပို့ဆောင်ပေးထားကြောင်း သိရသည်။