Pearl (NSS) - ဇွန် ၁၈

စဉ့်ကူမြို့နယ်တွင် မိုင်း‌ထောင်နေစဉ်ပေါက်ကွဲမှုကြောင့် PDF အဖွဲ့ဝင် အမျိုးသား (၂)ဦး သေဆုံးသွားခဲ့ကြောင်း လုံခြုံရေးအဖွဲ့နှင့် နီးစပ်သော သတင်းအရင်းအမြစ်ထံမှ သိရသည်။

ဖြစ်စဉ်မှာ ယနေ့ (ဇွန်လ ၁၈ ရက်)၊ နံနက်ပိုင်းတွင် မန္တလေးတိုင်း၊ စဉ့်ကူမြို့နယ်၊ နယ်မြေရဲစခန်းအရှေ့ဘက် ၄ မိုင်ခန့်ရှိ တောင်မင်းမြောက်မင်း လမ်းဆုံအနီးတွင် ဖြစ်ပွားခဲ့ကြောင်း သိရသည်။

အဆိုပါလမ်းဆုံအနီးသို့ PDF အဖွဲ့ဝင် (၂)ဦးသည် မိုင်းထောင်ဖောက်ခွဲရန်အတွက် ရောက်ရှိလာခဲ့ကြောင်း သိရသည်။

ထိုသို့ရောက်ရှိလာကာ  မိုင်းထောင်နေစဉ် ပေါက်ကွဲမှုဖြစ်ပွားခဲ့ပြီး ၎င်းတို့ (၂)ဦးလုံး အခင်းဖြစ်နေရာတွင် သေဆုံးသွားခဲ့ကြောင်း အထက်ပါသတင်းအရင်းအမြစ်မှ ဆိုသည်။

အလားတူ ပြီးခဲ့သည့်မတ်လ ၂၂ ရက်တွင် စစ်ကိုင်းတိုင်း၊ ချောင်းဦးမြို့နယ်၌ လက်လုပ်‌မိုင်းထောင်နေစဉ် ပေါက်ကွဲမှုကြောင့် အကြမ်းဖက်အမျိုးသားတစ်ဦးသေဆုံးသည့်ဖြစ်စဉ်ဖြစ်ပွားခဲ့သည်။

ပြီးခဲ့သည့် ဇွန်လ ၁၃ ရက်တွင်လည်း စစ်ကိုင်းတိုင်း၊ ရွှေဘိုမြို့နယ်တွင် တပ်မတော်စစ်ကြောင်းကားအား PDF အဖွဲ့များသည် မိုင်းခွဲတိုက်ခိုက်ခဲ့ပြီး  အပြန်တွင် ၎င်းတို့၏ဆိုင်ကယ်ပေါ်၌ ကျန်ရှိသည့်မိုင်းများမှ ထပ်မံပေါက်ကွဲမှုဖြစ်ပွားခဲ့ရာ ရွှေဘို PDF (၆)ဦး ထိခိုက်ဒဏ်ရာ အပြင်းအထန်ရရှိသည့် ဖြစ်စဉ် ဖြစ်ပွားထားသည်။