Pearl (NSS) - ဇွန် ၁၄

ရန်ကုန်တိုင်း၊ ရန်ကင်းမြို့နယ်ရှိ နေအိမ်တစ်ခု၏ ခေါင်းမိုးပေါ်၌ အမျိုးသားတစ်ဦး ဓာတ်လိုက်မှုဖြစ်ပွားခဲ့ကြောင်း သတင်းရရှိသည်။ 

ဖြစ်စဉ်မှာ ယနေ့ (ဇွန်လ ၁၄ ရက်) ၊ နေ့လည် (၂)နာရီ အချိန်ခန့်တွင် ရန်ကင်းမြို့နယ်၊ ၁၂ရပ်ကွက်၊ ကံဘဲ့ဘူတာရုံလမ်း၊ ကံဘဲ့တာဝါအနီးရှိ နေအိမ်တွင်ဖြစ်ပွားခဲ့ကြောင်း သိရသည်။ 

အသက် (၃ဝ)ဝန်းကျင်ရှိ အမျိုးသားတစ်ဦးသည် အဆိုပါ နေအိမ်ခေါင်းမိုးပေါ်တွင် ခေါင်မိုးအပေါက်ဖာနေစဉ် ဓာတ်လိုက်ကာ လဲကျမှုဖြစ်ပွားခဲ့ကြောင်း သိရသည်။ 

"နေ့လည် (၂)နာရီလောက်ကပါ။ ကျွန်တော်တို့သွားတဲ့အချိန် သူကသတိတော့မရဘူး။ အခုတော့ ဆေးရုံကို ပို့ပေးထားပါတယ်"ဟု မိုးစေတနာပရဟိတ၏ တာဝန်ရှိသူတစ်ဦးက NP News  ကိုပြောသည်။

ထို့ကြောင့် မိုးစေတနာ ပရဟိတအသင်းမှ အဆိုပါ အမျိုးသားအား ခေါင်မိုးပေါ်မှ မြေပြင်သို့ ကူညီကယ်ဆယ် ဆောင်ရွက်ပြီးနောက်  စံပြဆေးရုံသို့ ပို့ဆောင်ပေးခဲ့ကြောင်း သိရသည်။