NP News - ဇွန် ၁ဝ

Show Room ဖွင့်လှစ်ပြီးမှ EV ကားရောင်းရန်ညွန်ကြားထားသော်လည်း ဈေးကွက်အတွင်း ကြိုပွိုင့်ရောင်းခြင်းနှင့်တဆင့်ခံရောင်းချမှုများရှိနေကြောင်း ကားဝယ်ရောင်းလုပ်ငန်းရှင်များထံမှသိရသည်။ 

သက်ဆိုင်ရာက EV ကားတင်သွင်းရောင်းချသူများကို အရောင်းပြခန်း (Show Room)အရင်ဆုံးဖွင့်လှစ်ပြီးမှသာ တင်သွင်းလာသော EV ကားများကိုရောင်းချရန် စည်းမျဉ်းကန့်သတ်ထားကြောင်းသိရသည်။ 

“Show Room လဲမရှိဘူး။ တချို့ဆိုမြေနေရာတောင်မရှိသေးတဲ့ ကုမ္ပဏီတွေက EV ကားကြိုပွိုင့်နဲ့ရောင်းနေကြတာ။ နောက်ပြီးတင်သွင်းလာတဲ့ကုမ္ပဏီနာမည်ပေါက်မဟုတ်ဘဲ တဆင့်ခံတခြားကုမ္ပဏီတွေ နာ မည်နဲ့ EV လျှပ်စစ်ကားရောင်းနေကြတယ်။ ဝယ်တဲ့သူက နားမလည်တော့ဝယ်နေတာဘဲ။ ပြောရရင်အာမခံချက်မရှိဘဲ ရောင်းသလိုဖြစ်နေတယ်”ဟု ကားဝယ်ရောင်းလုပ်ငန်းရှင်တစ်ဦးက ပြောသည်။ 

EV ကားနှင့်ပတ်သက်သည့်အခွန်အခများကို သက်ဆိုင်ရာက ကင်းလွတ်ခွင့်ပေးထားသော်လည်း ဈေးနှုန်းကျဆင်းမှုမရှိဘဲ ဈေးအမြင့်ပိုင်းတွင် ရှိနေကြောင်းသိရသည်။ 

သက်ဆိုင်ရာကသတ်မှတ်ထားသည့် အမြတ်ပမာဏ (၁၅)ရာခိုင်နှုန်းမှ (၂ဝ)ရာခိုင်နှုန်းအတွင်းရောင်းချခြင်းမရှိဘဲ တင်သွင်းလာသည့် ဈေးထက်အမြတ်ပိုကျန်ရန် တဆင့်ခံလက်လွှဲရောင်းချသည့် ပုံစံကျင့်သုံးမှုရှိနေကြောင်းသိရသည်။  

“တရားဝင်ကိုယ်စားလှယ်ကုမ္ပဏီဆီက ဝယ်ရင်တော့ဈေးသက်သာတယ်စိတ်ချရပါတယ်။ ဒါပေမယ့်အခုလျှပ်စစ်ကားတင်သွင်းသူအများစုက တရားဝင်ကိုယ်စားလှယ်မဟုတ်ဘူး။ နိုင်ငံခြားကဝယ်ပြီး ပြည်တွင်းမှာပြန်ရောင်းတဲ့ပုံစံဘဲရှိတယ်။ အများစုက Show Room လဲမရှိဘူး။ Service လဲမရှိဘူး။ မသိဘဲဝယ်လိုက်မိရင် ပျက်တဲ့အခါ ပြင်ဖို့ခက်ကုန်လိမ့်မယ်”ဟု ကားဝယ်ရောင်းတစ်ဦးကပြောသည်။ 

EV ကားတင်သွင်းခွင့်ရရှိထားသည့်ကုမ္ပဏီ (၃ဝ)ကျော်မှ ကား Brand မျိုးစုံတင်သွင်းနေသော်လည်း ဝန်ဆောင်မှုနှင့်အာမခံချက်ပေးနိုင်သည့် ကုမ္ပဏီ နည်းပါးကြောင်းသိရသည်။ 

ပြည်တွင်းသို့တင်သွင်းသော EV လျှပ်စစ်ကား အများစုသည် ငွေကျပ်သိန်း(၇ဝဝ)မှ သိန်း(၁ဝဝဝ)ကြားသာရှိသော်လည်း ဈေးကွက်အတွင်း ကြိုပွိုင့်ဈေးဖြင့်ရောင်းချမှုသည် ငွေကျပ်သိန်း (၁၃ဝဝ)အထက်တွင်ရှိကြောင်းသိရသည်။