Pearl (NP News) - ဇွန် ၈

ပြင်ဦးလွင်မြို့ပတ်လမ်းတွင် အမျိုးသမီးတစ်ဦး ကားပေါ်မှပြုတ်ကျပြီး သေဆုံးခဲ့ကြောင်း သန္တိသုခအခမဲ့ လူမှုကူညီရေးအသင်းထံမှ သတင်းရရှိသည်။ 

ဖြစ်စဉ်မှာ ယနေ့ (ဇွန်လ ၈ရက်)၊ နံနက် (၈)နာရီ (၃ဝ)မိနစ်အချိန်ခန့်တွင် ပြင်ဦးလွင်မြို့၊ မန္တလေး-လာရှိုးလမ်း၊ ပြင်ဦးလွင်မြို့ပတ်လမ်း၊ ထိပ်တန်း ထမင်းဆိုင်အနီးတွင် ဖြစ်ပွားခဲ့ကြောင်း သိရသည်။ 

ပြင်ဦးလွင်မြို့နေ အသက် (၄ဝ)နှစ်အရွယ် အမျိုးသမီးတစ်ဦးသည် အခင်းဖြစ်နေရာတွင် ကားပေါ်မှ နောက်ပြန်ပြုတ်ကျခဲ့ကြောင်း သိရသည်။

"ဘယ်လို ပြုတ်ကျလဲတော့မသိဘူး၊၊ ကားကတော့ သူတို့အိမ်ကကားပဲ။ နောက်ပြန်ပြုတ်ကျတာ။ ခေါင်းပွင့်သွားတယ်။ နေရာမှာပဲ ဆုံးသွားတယ်" ဟု သန္တိသုခ အခမဲ့လူမှုကူညီရေးအသင်း၏ တာဝန်ရှိသူတစ်ဦးမှ NP News ကို ပြောသည်။ 

ဖြစ်စဉ်ကြောင့် အဆိုပါအမျိုးသမီးတွင် ဦးခေါင်းပွင့်ထွက် ဒဏ်ရာရရှိကာ အခင်းဖြစ်နေရာ၌ သေဆုံးသွားခဲ့ကြောင်း သိရသည်။ 

လက်ရှိတွင် ၎င်းရုပ်အလောင်းအား ပြင်ဦးလွင်မြို့နယ် ပြည်သူ့ဆေးရုံသို့ ပို့ဆောင်ပေးထားကြောင်း သိရသည်။