Pearl (NP News) - ဇွန် ၈

အင်းစိန်မြို့နယ်တွင် အသက်(၉)နှစ်အရွယ် ကလေးငယ်တစ်ဦးအား ကားတစ်စီးက တိုက်မိပြီး ထွက်ပြေးမှုဖြစ်ပွားခဲ့ကြောင်း တွဲလက်လူမှုကူညီရေးအဖွဲ့ထံမှ သိရသည်။

ဖြစ်စဉ်မှာ ယမန်နေ့ (ဇွန်လ ၇ ရက်)၊ ည (၁ဝ)နာရီ၊ (၄၅)မိနစ်အချိန်ခန့်တွင် ရန်ကုန်တိုင်း၊ အင်းစိန်မြို့ နယ်၊ အောင်ဆန်းကွင်းဈေးရှေ့တွင် ဖြစ်ပွားခဲ့ကြောင်း သိရသည်။

ပလုံကောက်သူ မောင်ကောင်းခန့်အောင်(၉)နှစ်အား အဆိုပါဈေးရှေ့၌ ကားတစ်စီးမှတိုက်ခဲ့ပြီး မောင်းပြေးသွားခဲ့ကြောင်း သိရသည်။ 

"ကားကတော့တိုက်ပြီး ထွက်ပြေးသွားတယ်။ ကားက ဘာကားလည်း အတိအကျမသိရဘူး။ ဖြစ်စဉ်မှာကတည်းက ကလေးကအနီရောင်အဆင့်။ သွေးထွက်လွန်နေတယ်။ ညကတည်းက သတိက တစ်ချက်ပဲ လည်တယ်။ အခုမနက်တော့ ဆုံးသွားတယ်ကြားတယ်။ အတိအကျတော့ ကျွန်တော်တို့လည်း စုံစမ်းနေတုန်းပါ။ ကားက တိုက်တာ တော်တော်အရှိန်ပြင်းတယ်"ဟု တွဲလက်လူမှုကူညီရေးအဖွဲ့၏ တာဝန်ရှိသူတစ်ဦးမှ NP News ကိုပြောသည်။ 

ဖြစ်စဉ်ကြောင့် မောင်ကောင်းခန့်အောင်တွင် ဦးခေါင်းနှင့်နဖူးတို့၌ ကွဲရှဒဏ်ရာ၊ ဒူးခေါင်း၌ စုတ်ပြဲဒဏ်ရာနှင့် မျက်နှာတစ်ခြမ်း ပိန်ချိုင့်သွားခဲ့ကြောင်း သိရသည်။