Pearl (NP News) - ဇွန် ၅

မန္တလေးတိုင်း၊ မြင်းခြံမြို့နယ်တွင် ရေတွင်းထဲပြုတ်ကျသော ဖခင်ဖြစ်သူအား သားဖြစ်သူမှဆင်းကယ်ရာမှ (၂)ဦးလုံး အောက်ဆီဂျင်ပြတ်၍ သေဆုံးသွားခဲ့ကြောင်း မြန်မာနိုင်ငံမီးသတ်တပ်ဖွဲ့ထံမှ သတင်းရရှိသည်။ 

ဖြစ်စဉ်မှာ ယနေ့ (ဇွန်လ ၅ရက်) ၊ နံနက် (၉)နာရီ (၄၅)မိနစ်အချိန်ခန့်တွင် မြင်းခြံမြို့နယ်၊ အမှတ်(၄)ရပ် ကွက်တွင် ဖြစ်ပွားခဲ့ကြောင်း သိရသည်။ 

အဆိုပါရပ်ကွက်၊ နယ်မြေ(၁၁)တွင်နေထိုင်သော ဦးဘိုသန့်(၅၅)နှစ် သည် ၎င်း၏နေအိမ်ရှေ့ရှိ အနက် ၃ဝ ပေ၊ အကျယ် ၃ပေခန့်ရှိသော ရေတွင်း၌ အင်္ဂတေကိုင်နေစဉ် ပြုတ်ကျသွားခဲ့ရာ ၎င်း၏သားဖြစ်သူ မောင်ပြည့်စုံ (၁၈)နှစ်မှ ဖခင်ဖြစ်သူအား ဆင်းကယ်ခဲ့ကြောင်း သိရသည်။

"သူ့အိမ်ရှေ့က ရေတွင်းမှာ အင်္ဂတေကိုင်ရင်း သူ့အဖေပြုတ်ကျတော့ သားက ကယ်ရင်း ပြန်တတ်လို့မရတော့တာ။ အောက်ဆီဂျင်ပြတ်သွားတာမျိုး။  ကယ်ပြီးတဲ့အချိန်ကတည်းက အသက်က သိပ်မရှူတော့ဘူး၊ ‌ဆေးရုံရောက်တော့ ဆုံးသွားပြီ"ဟု မြင်းခြံမြို့နယ် မီးသတ်စခန်း၏ တာဝန်ရှိသူတစ်ဦးက NP News ကို ပြောသည်။

ဖြစ်စဉ်ကြောင့် ၎င်းတို့(၂)ဦးသေဆုံးသွားခဲ့ပြီး လက်ရှိတွင် ၎င်းတို့ရုပ်အလောင်းအား မြင်းခြံခရိုင်ပြည်သူ့ဆေးရုံသို့ပို့ဆောင်ပေးထားကြောင်း သိရသည်။