စော (NP News)- ဇွန် ၄

ပဲခူးတိုင်း၊ ကြို့ပင်ကောက်မြို့တွင် ရပ်ထားသောတွဲကားအား ဆိုင်ကယ်မှဝင်တိုက်မိ၍ အမျိုးသား(၂)ဦးသေဆုံးခဲ့ကြောင်း သိရသည်။

ဖြစ်စဉ်မှာ ယနေ့(ဇွန်လ ၄ ရက်)၊ နံနက် (၁)နာရီအချိန်တွင် ကြို့ပင်ကောက်မြို့၊ ကျွဲဘိကျေးရွာအနီး၌ အထက်ပါကဲ့သို့ ဖြစ်ပွားခဲ့ကြောင်း နာရေးကူညီမှုအသင်း-ကြို့ပင်ကောက်ထံမှ သိရသည်။

အဆိုပါတွဲကားသည် ပြည်မြို့မှ ရန်ကုန်သို့ ပြန်လာသည့် ကားဖြစ်ပြီး စက်ပျက်နေသောကြောင့် လမ်းပေါ်တွင်ရပ်ထားခြင်းဖြစ်ကြောင်း သိရသည်။

“ဆိုင်ကယ်က အမျိုးသားနှစ်ယောက်စီးလာတာပါ။ စီးလာရင်း ရပ်ထားတဲ့တွဲကားကို ဝင်တိုက်တာပါ။ တွဲကားက ပျက်နေတော့ မောင်းမရလို့ လမ်းပေါ်မှာရပ်ထားတာပါ။ တွဲကားမှာဘာမှတော့တင်မလာပါဘူး”ဟု နာရေးကူညီမှုအသင်း-ကြို့ပင်ကောက်မှ တာဝန်ရှိသူတစ်ဦးက NP News ကိုပြောသည်။

သေဆုံးသူအမျိုးသားနှစ်ဦးအနက် တစ်ဦးသည် စိုင်းရှိုင်းထွတ် (၂၃)နှစ်ဖြစ်ပြီး ကျန်အမျိုးသားတစ်ဦးသည် စိုင်းလင်းထက်(၂၆)နှစ်ဖြစ်ကြောင်း ၎င်းကဆက်လက်ပြောဆိုထားသည်။

အဆိုပါအမျိုးသားနှစ်ဦးသည် ဇီးကုန်းမြို့မှ ကြို့ပင်ကောက်မြို့သို့ ပြန်လာစဉ် သေဆုံးခဲ့ခြင်းဖြစ်ပြီး ကြို့ပင်ကောက်ပြည်သူ့ဆေးရုံ ရင်ခွဲရုံသို့ပို့ဆောင်ပေးထားကြောင်း သိရသည်။