NP News - ဇွန် ၃

 ရှမ်းပြည်နယ် တောင်ပိုင်း၊ ကလောမြို့နယ်၊ အောင်ပန်းမြို့၌ ယမန်နေ့ (ဇွန်လ ၂ ရက်)က အပဝင်သည်ဟုဆိုကာပယောဂ ဆရာဆိုသူက ရိုက်နှက်ကုသရာမှ အသက်(၃၃)နှစ်အရွယ် အမျိုးသမီးတစ်ဦး သေဆုံးသွားကြောင်းသိရသည်။ 

အောင်ပန်းမြို့၊ ရပ်ကွက်(၃)နေ အမျိုးသမီးတစ်ဦးသည် ကိုယ်လက်ညောင်းညာပြီး ဘုရားစင်ရှေ့၌ ခြေထောက်ထိုးခြင်း၊ ဟိန်း‌ဟောက် ဆဲဆိုခြင်းများပြုလုပ်နေသည့်အတွက် အပဝင်သည်ဟုဆိုကာ မိသားစုဝင်များက တစ်ရပ်ကွက်တည်းနေ ပယောဂ ဆရာထံ သွားရောက် ပြသခဲ့ကြောင်း ဒေသခံ တစ်ဦးက NP News ကိုပြောသည်။

 ပယောဂ ဆရာသည် အမျိုးသမီး ခန္ဓာကိုယ်ထဲတွင် အပဝင်နေသည်ဟုဆိုကာ ပါးရိုက်ခြင်း၊ ကြိမ်တုတ်၊ ရေထမ်းတံပိုးတို့ဖြင့် ဦးခေါင်း သာမက ခန္ဓာကိုယ် နေရာအနှံ့ကိုရိုက်နှက်ရာမှ မလှုပ်နိုင်တော့ချိန်တွင် အပဝင်ခြင်း မထွက်ဟုပြောဆိုကာ အိမ်ပြန်လွှတ်လိုက်ခဲ့ကြောင်းသိရသည်။

 ရိုက်နှက်ခံရသည့် ဒဏ်ရာအပြင်းအထန်ရသွားသည့် အမျိုးသမီးကို မိသားစုဝင်များက ကလောဆေးရုံမှတဆင့် နေပြည်တော်ဆေးရုံသို့ ပို့ဆောင်စဉ် လမ်း၌သေဆုံးသွားကြောင်း စုံစမ်းသိရှိရသည်။

 အဆိုပါဖြစ်စဉ်ကြောင့် အောင်ပန်းမြို့၊ ရပ်ကွက်(၃)‌တွင် နေထိုင်သည့် အသက်(၅ဝ)အရွယ် ပယောဂဆရာဆိုသူကို မိသားစုဝင်များက အမှုဖွင့်ထားကြောင်းသိရသည်။