NP News - ဇွန် ၃

ဘားအံမြို့အဝင်အထွက်များတွင် စစ်ဆေးရေးဂိတ်ဖွင့်လှစ်ပြီး လိုင်စင်မဲ့ကားများ စတင်ဖမ်းဆီးနေကြောင်း မြို့ခံပြည်သူများထံမှသိရသည်။ 

"အရင်ကဖောင်းကြွနံပါတ်ပဲစစ်တာ။ မနေ့က စပြီးမြို့ဝင်ဂိတ်နဲ့ မြို့ထဲနေရာ တော်တော်များများမှာယာဉ် ထိန်းရဲတွေတင်မကဘူး အခြားဝန်ထမ်းတွေနဲ့ စစ်သားတွေလည်း ပါတယ်။ ကားတွေ၊ ဆိုင်ကယ်တွေကို စစ်နေတာ။ မသင်္ကာတဲ့ကားတွေဆို တော်တော်အချိန်ကြာကြာကို စစ်နေတာတောင် တွေ့ရတယ်" ဟု ဘားအံမြို့၌ နေထိုင်သူတစ်ဦးက NP News ကိုပြောသည်။

လိုင်စင်မဲ့ကားများအား ယမန်နေ့ (ဇွန်လ ၂ရက်)မှစ၍ စစ်ဆေးအရေးယူမှုကို ဘားအံမြို့တွင်သာမက နယ်စပ်မြို့များတွင်လည်း ပြုလုပ်လျက်ရှိကြောင်းသိရသည်။

ကရင်ပြည်နယ်၊ ဘားအံမြို့၌ ဇွန်လ ၁ ရက်မှ စတင်ကာ လိုင်စင်မဲ့ကားများအား ပူးပေါင်းအဖွဲ့များဖြင့် လှည့်လည်စစ်ဆေးကာ ဖမ်းဆီးမည်ဖြစ်ပြီး တွေ့ရှိပါက ကားအားသိမ်းယူမည်ဖြစ်ကာ အသုံးပြုသူအား ပို့ကုန်သွင်းကုန်ဥပဒေဖြင့် အရေးယူမည်ဟု ဘားအံခရိုင် ယာဉ်အန္တရာယ်၊ လမ်းအန္တရာယ် ကင်းရှင်းရေးအဖွဲ့က အသိပေးလက်ကမ်းစာရွက်များ လိုက်လံဝေငှခဲ့သည်ဟု ဘားအံမြို့ခံများကပြောသည်။ 

စစ်ဆေးတွေ့ရှိပါက လိုင်စင်မဲ့မော်တော်ယာဉ်ကို ပြည်သူ့ဘဏ္ဍာအဖြစ် သိမ်းဆည်းခြင်း ခံရမည်ဖြစ်သည့်အပြင် လက်ဝယ်ထားရှိအသုံးပြုသူအား ပို့ကုန်/သွင်းကုန်ဥပဒေပုဒ်မ - ၈ ဖြင့် အရေးယူ၍ (၃)နှစ်ထက် မပိုသော ထောင်ဒဏ်ဖြစ်စေ၊ ငွေဒဏ်ဖြစ်စေ၊ ဒဏ်နှစ်ရပ်စလုံးဖြစ်စေ ကျခံရမည်ဖြစ်ကြောင်း ဘားအံခရိုင် ယာဉ်အန္တရာယ်၊ လမ်းအန္တရာယ်ကင်းရှင်းရေးအဖွဲ့က ကြေညာထားသည်။

အလားတူ ဘားအံမြို့အစိုးရဌာနဆိုင်ရာရုံးဝန်းများအတွင်း လိုင်စင်မဲ့ကားများ ရပ်နားထားပါက စစ်ဆေးသိမ်းဆည်းနေကြောင်းသိရသည်။  

လက်ရှိအချိန်တွင် ကျေးရွာများဘက်မှ ပြည်သူများသည် ဘားအံမြို့ပေါ်သို့လာရောက်မှု နည်းပါးသွားပြီးမြို့တွင်း၌လည်း လိုင်စင်မဲ့ကားများ မောင်းနှင်မှုမရှိတော့ကြောင်းမြို့ခံများထံမှသိရသည်။ 

ပြီးခဲ့သည့် ရက်ပိုင်းအတွင်းက လိုင်စင်မဲ့ကားများအား တစ်နိုင်ငံလုံးအတိုင်းအတာဖြင့် ဖမ်းဆီးနိုင်ရေး စီမံချက်ရေးဆွဲပြီး စစ်ဆင်ရေးအသွင်ဖြင့်ဆောင်ရွက်ရန် နစက၏ ပြည်ထဲရေးဝန်ကြီးဌာနမှ အောက်ခြေတပ်ဖွဲ့ဝင်များအား ညွှန်ကြားထားကြောင်းသိရသည်။