Pika (NSS) - နိုဝင်ဘာ ၁၄

တောင်တရုတ်ပင်လယ်အရေးနဲ့ပတ်သက်ပြီး အင်ဒိုနီးရှားနိုင်ငံရဲ့ အချုပ်အခြာအာဏာကို အမြဲတမ်းကာကွယ်သွားမယ်လို့ အင်ဒိုနီးရှားသမ္မတ ပရာဘိုဝိုဆူဘီယန်တိုက ပြောကြားခဲ့ပါတယ်။

ဒါ့ပြင် မိတ်ဖက်ဆက်ဆံရေးတွေဟာ ပဋိပက္ခတွေဖြစ်ပွားတာထက် ပိုမိုကောင်းမွန်ပြီး အခြား အင်အားကြီးနိုင်ငံတွေအားလုံးကိုလည်း အလေးထားတယ်လို့ ပရာဘိုဝိုဆူဘီယန်တိုက ထပ်မံပြောကြားခဲ့ပါတယ်။ ပရာဘိုဝိုဆူဘီယန်တိုဟာ နိုဝင်ဘာလ(၁၃)ရက်မှာ အမေရိကန်နိုင်ငံ ဝါရှင်တန်မြို့ကိုရောက်ရှိနေစဉ်အချိန်အတွင်း ယခုလိုမှတ်ချက်ပြုပြောဆိုခဲ့တာ ဖြစ်ပါတယ်။ ပြီးခဲ့တဲ့သီတင်းပတ်တုန်းက တရုတ်နိုင်ငံနဲ့ ပင်လယ်ရေကြောင်းဆိုင်ရာ သဘောတူညီချက်ကို လက်မှတ်ရေးထိုးခဲ့ပေမယ့်လည်း တောင်တရုတ်ပင်လယ်အရေးနဲ့ပတ်သက်ပြီး တရုတ်ရဲ့နယ်မြေပိုင်ဆိုင်မှုပြောဆိုချက်တွေကို အင်ဒိုနီးရှားက အသိအမှတ် ပြုမှာ မဟုတ်ဘူးလို့ အင်ဒိုနီးရှားနိုင်ငံခြားရေးဝန်ကြီးဌာနက ထုတ်ပြန်ပြောဆိုခဲ့ပြီးနောက် ပရာဘိုဝိုဆူဘီယန်တိုရဲ့ ပြောဆိုချက်တွေ ထွက်ပေါ်လာတာပဲဖြစ်ပါတယ်။

တရုတ်နိုင်ငံဟာ တောင်တရုတ်ပင်လယ်တစ်ခုလုံးနီးပါးကို ၎င်းပိုင်ဆိုင်ကြောင်း အခိုင်အ မာပြောဆိုထားမှုနဲ့အတူ အခြားနိုင်ငံအများအပြားနဲ့ အငြင်းပွားမှုတွေဖြစ်ပွားလျက်ရှိနေတာလည်း ဖြစ်ပါတယ်။ ပရာဘိုဝိုဆူဘီယန်တိုက "အခြားအင်အားကြီးနိုင်ငံတွေအားလုံးကို လေးစားပေမယ့် ကျွန်တော်တို့ရဲ့ အချုပ်အခြာအာဏာကိုတော့ အမြဲတမ်းကာကွယ်သွားမှာပါ။ ဒါပေမဲ့ မိတ်ဖက်ဖြစ်နိုင်ဖို့အတွက် ဖြစ်နိုင်ခြေတွေကို ကျွန်တော်တို့အမြဲတမ်းရှာဖွေသွားမှာပါ။ မိတ်ဖက်ဆက်ဆံရေးဟာ ပဋိပက္ခတွေထက် ပိုမိုကောင်းမွန်ပါတယ်"လို့ ပြော ဆိုခဲ့ပါတယ်။ ပြီးခဲ့တဲ့လတုန်းက သမ္မတအဖြစ် စတင်တာဝန်ထမ်းဆောင်ခဲ့တဲ့ ပရာဘိုဝိုဆူဘီယန်တိုဟာ ၎င်းရဲ့ပထမဆုံးခရီးစဉ်အတွင်း တရုတ်သမ္မတရှီကျင့်ဖျင်နဲ့ ဘေဂျင်းမြို့မှာ ပြီးခဲ့တဲ့ရက်ပိုင်းက တွေ့ဆုံခဲ့တယ်လို့လည်းသိရပါတယ်။