ယွန်း (NSS) - နိုဝင်ဘာ ၈

ပြည်တွင်းထုတ်လုပ်မှုကို ရေတို၊ ရေရှည်ပုံစံမျိုးဖြင့် ဆောင်ရွက်သင့်ပြီး ကုန်သွယ်ရေးနှင့် စီးပွားရေး သတ်မှတ်ချက်များကြောင့် ကုန်ဈေးနှုန်းထပ်မံတက် နိုင်သည့် အခြေအနေတွင်ရှိနေကြောင်း စီးပွားရေးလုပ်ငန်းရှင် အသိုင်းအဝိုင်းထံမှ သိရသည်။

စီးပွားရေးနှင့် ကူးသန်းရောင်းဝယ်ရေးဝန်ကြီးဌာနအနေဖြင့် ပင်လယ်ရေကြောင်းမှ ပို့ကုန်ပစ္စည်း အားလုံးနှင့် နယ်စပ်ကုန်သွယ်မှုမှ တင်ပို့သည့် ဆီထွက်သီးနှံ(မြေပဲ၊နှမ်း) အပါအဝင် ကုန်စည်(၈)မျိုးကို ဗဟိုဘဏ်၏ သတ်မှတ်ချက်နှင့်အညီ ပို့ကုန်ရငွေ၏ (၂၅)ရာခိုင်နှုန်းလဲလှယ်အသုံးပြုရမည့် ကုန်စည်အဖြစ် သတ်မှတ်ဆောင်ရွက် လျက်ရှိ ကြောင်း သိရသည်။ ထို့ပြင် အဆိုပါ ကုန်စည်(၈)မျိုးအပြင် ပဲမျိုးစုံ၊ ကြက်သွန်ဖြူ၊ နီနှင့် သစ်သီးမျိုးစုံ/သီးနှံမျိုးစုံတို့ကို လည်း ထပ်တိုး၍ ပို့ကုန်ရငွေ၏ (၂၅) ရာခိုင်နှုန်းလဲ လှယ်ခြင်းကို နိုဝင်ဘာ(၁)ရက်မှစ၍ ဆောင်ရွက်သွားမည်ဖြစ်ကြောင်း အောက်တိုဘာ(၃၀)ရက်က အသိပေးထားသည်။

‘အားလုံးကတော့ ၁၀ဝ% မပေးရင် အခက်အခဲ ကတော့ရှိတယ်။ ရောင်းလိုက်တဲ့ပိုက်ဆံတွေကို အစိုးရက ၂၁၀ဝ (ကျပ်)နဲ့ဖြတ်လိုက်တဲ့အချိန်မှာ တစ်ကြိမ်ရှုံးတယ်။ တကယ်က အဲဒီလူတွေက ပစ္စည်းအပြင်မှာ ပြန်ဝယ်ရရင် အပြင် ပေါက်ဈေးနဲ့ဝယ်ရတာ။ အဲဒီတော့ ၂၅% ဆိုတာလည်းမရှိသင့်တော့ဘူး။ အမှန် တော့ ၁၀ဝ% အားလုံးကိုဖြေ လျှော့သင့်ပြီ။ (၆)လ အတွင်းမှာ  Export ဘယ်လောက်ရတယ်ဆိုပြီး သူတို့ပြောနေတာတွေရှိတော့ တကယ် တော့ဖြေလျှော့သင့်တယ်’ဟု ပို့ကုန်လုပ်ငန်းရှင်ကြီးတစ်ဦးက NSS ကိုပြောသည်။

လက်ရှိတွင် တရုတ်- မြန်မာနယ်စပ်ကုန်သွယ်ရေး၌ အသုံးပြုနေသည့် နယ်စပ်ဂိတ်အချို့ကို တရုတ် ဘက်မှ ပိတ်ထားသည့်အပြင် ပို့ကုန်ရငွေပြနိုင်မှသာ သွင်းကုန်လိုင်စင်ရရှိမည်ဆိုသည့် သတ်မှတ်ချက်များ ကြောင့် ပြည်တွင်း၌ ကုန်ဈေးနှုန်းများတက်လာနိုင်ကြောင်း သုံးသပ်မှုများလည်းရှိနေသည်။ ပြည်တွင်း၌ ထုတ်ကုန်ပစ္စည်းလုံလောက်စွာ မရှိသည့်အတွက် ပြည်ပတင်သွင်းကုန်များကိုသာ အားထားနေရသည့် အခြေအနေ၌ နိုင်ငံတော်အနေဖြင့် ပြည်တွင်း ထုတ် လုပ်မှုကို ရေတို၊ ရေရှည်အစီအစဉ်များဖြင့် ဆောင်ရွက်သင့်ကြောင်း စီးပွားရေးလုပ်ငန်းရှင်များက အကြံပြုထားသည်။

‘ကျွန်တော်တို့နိုင်ငံက ၁၀ဝ% ပြည်တွင်းမှာ ထုတ်နိုင်တဲ့နိုင်ငံမဟုတ်ဘူး။ စားသောက်ကုန်ရဲ့ အချောထည် အများစုတောင်မှ တချို့ဟာတွေက Import ပေါ်မှီနေရတဲ့ဟာတွေရှိတယ်။ ဥပမာ- အချိုမှုန့်လိုဟာမျိုးတွေ၊ သကြားလို ဟာမျိုးတွေက ပြည်တွင်းမှာ မလောက်လို့ တရုတ်ကနေပြန်သွင်းရ အောင်တောင်လုပ်နေတာ။ နောက်ကျန်တဲ့ ငံပြာရည် တောင် အလုံအလောက်မရှိဘူး။ ကိုယ်စားဖို့ဟာ တောင် အလုံ အလောက်ထုတ်နိုင်တဲ့နိုင်ငံထဲမှာတောင် မရှိဘူး။ မရှိ တဲ့အချိန်မှာ ဒါတွေကိုလျှောက်ပိတ်တာက ကုန်ဈေး နှုန်းတက်ဖို့ပဲရှိတယ်။ တကယ်က ပြည်တွင်း ထုတ်လုပ်မှုကို ရေတို၊ ရေရှည်မျိုးနဲ့သွားသင့်တယ်။ ဘယ်ပစ္စည်းကို ဘယ်လောက်အထိတော့ ဘာလုပ်မယ်။ အဲဒီနောက်ပိုင်းကျရင်တော့ ထုတ်ဖို့ကြိုးစားပါ ဆိုပြီး ကြိုးစားရမှာ။ ဖြေလျှော့သင့်တာတွေကို ဖြေလျှော့ရမယ်။ နိုင်ငံတော်က သတ်မှတ်ထားတဲ့  သတ် မှတ်ချက်တွေကြောင့် ကုန်ဈေးနှုန်းက တက်လာမယ့် သဘောရှိတယ်။ ကုန်သွယ်ရေး၊ စီးပွားရေးမူဝါဒ အမှား တွေကြောင့် ဈေးတွေထပ်ပြီးတက်ဦးမှာလို့ ကျွန်‌တော်ကတော့ သုံးသပ်တယ်’ဟု စီးပွားရေးလုပ် ငန်းရှင်ကြီး တစ်ဦးက ပြောသည်။

နိုင်ငံအတွင်း ဖြစ်ပွားနေသည့် တိုက်ပွဲများကြောင့် နယ်စပ်ကုန်သွယ်ရေးစခန်းအချို့သည် ရပ်နားနေရ လျက်ရှိပြီး နယ်စပ်ကုန်သွယ်ရေးအစား ရေလမ်းကြောင်းသို့ ပြောင်းလဲကာ ကုန်သွယ်နေရပြီး စရိတ်စခကွာဟမှုများ အပြင် နှောင့်နှေးကြန့်ကြာမှု များလည်းရှိနေကြောင်း သိရသည်။